बारा, असार १२ । बारामा गोली हानी क्याम्पस प्रमुख हरिभूषण कुशवाहाको हत्या गरेको घटनाको मुख्य कारण जग्गा किनबेच विवाद साँधसिमाना र घरायसी कारणबाट भएको पछिल्लो अनुसन्धानबाट खुलेको छ । जिल्ला प्रहरी कार्यालय बाराले सात जना आरोपितहरूलाई पक्राउ गरेसँगै घटनाको रहस्य खुलेको हो । हत्याको घटनामा दर्जन बढी सामेल भएको अनुसन्धानबाट खुलेको छ ।
२०८१ जेठ ३२ गते बाराको कलैयास्थित रामराजा बहुमुखी क्याम्पसका प्रमुख कुशवाहाको हत्या भएको थियो घटनामा संलग्न सात जनालाई प्रहरीले पक्राउ गरेको थियो । ठुलो योजनामा हत्या भएको र हतियार सप्लाई लगायत अधिकांश अनुसन्धान अन्तिम चरणमा पुगेपनि थप केही हत्याका आरोपी फरार रहेकोले पक्राउ परेकालाई प्रहरीले सार्वजनिक गरेको छैन् ।
पक्राउ पर्नेमा बारा खजुरिया टोलका ३२ वर्षीय अवधलाल प्रसाद कुशवाहा, २९ वर्षीय चांदसी प्रसाद कुशवाहा, २७ वर्षीय चुल्हाई भन्ने श्रवण कुमार साह र ५० वर्षीय ब्रह्मदेव राम छन् । त्यस्तै बाराकै ५० वर्षीय मोतीलाल चौधरी, ३४ वर्षीय राधेश कुमार पटेल र ५४ वर्षीय विनोद राउत कुर्मी पक्राउ परेका हुन् ।
प्रहरीले उनीहरूको साथबाट तीनवटा मोटर साइकल, ६ राउन्ड गोली, मोबाइल, ल्यापटप र नेपाली तथा भारतीय सिम कार्ड समेत बरामद गरेको छ । उनीहरूमाथि कर्तव्य ज्यान तथा हातहतियार खरखजाना मुद्दा चलाउन बारा जिल्ला अदालतबाट ६ दिन म्याद थप भई अनुसन्धान भइरहेको प्रहरीले जनाएको छ । कुशवाहामाथि आदर्शकोतवाल गाउँपालिका–३ बतरा भन्ने स्थानमा गोली प्रहार भएको थियो ।
घर जाँदै गरेका उनीमाथि मोटरसाइकलमा आएका दुई जनाले पछाडिबाट गोली प्रहार गरेका थिए । पिठ्युँमा गोली लागेका कुशवाहाको उपचारको क्रममा वीरगन्जस्थित न्युरो अस्पतालमा मृत्यु भएको थियो ।
