ललितपुर (सानागाउँ) २९, साउन । जनता समाजवादी पार्टी नेपालको केन्द्रीय समिति बैठक आज तेस्रो दिन पनि जारी छ । मंगलबार ललितपुरको महालक्ष्मी नगरपालिका ६, सानागाउँको थसी ब्यांक्वेटमा बिहान ११ बजेदेखि बैठक सुरु भयो ।
बैठकको प्रथम सत्रमा राष्ट्रिय सभाका सांसद डा. खिमलाल देवकोटाले संघीय प्रणालीको अभ्यास, आवश्यक्ता, महत्व र यसको कार्यान्वयनको चरण लगायतका बिषयमा केन्द्रीय सदस्यहरुलाई प्रशिक्षण दिएका छन् ।
यसपश्चात् जसपा नेपालका अध्यक्ष उपेन्द्र यादवले बैठकको प्रस्तुत गरेका राजनीति प्रतिवेदनमाथि छलफल सुरु हुनेछ । देशैभरीबाट सहभागी दुई सय १५ जना केन्द्रीय सदस्यको राय सुझावसहित सो प्रतिवेदनलाई पारित गर्ने कार्यसूचि रहेको छ ।
अध्यक्ष यादवले पार्टीको केन्द्रीय समिति बैठकमा ६१ बुँदे राजनीतिक प्रस्ताव पेश गरिसकेका छन् । सो राजनीतिक प्रस्तावमा प्रस्तावमा संघीयता कार्यान्वयन, संविधान संशोधन, सामाजिक न्यायको हक, निर्वाचन क्षेत्र निर्धारणलगायत विषयहरू उल्लेख छन् ।
यसका साथै जसपा नेपालले पाँच लाख नयाँ संगठित क्रियाशील सदस्य थप्न चारमहिने संगठन निर्माण अभियान चलाउने प्रस्ताव समेत उल्लेख छ ।
जनकपुरधाममा सम्पन्न एकताको प्रथम महाधिवेशनपछि नवगठित केन्द्रीय समितिको साउन २७ गतेदेखि सुरु भएको पहिलो बैठक भोलि बुधबार सम्पन्न हुनेछ ।
यसअघि सोमबार राजनीति विष्लेषक विजयकान्त लाल कर्ण, संचारकर्मी प्रनव खरेल, अभिवक्ता शंकर लिम्बू र अर्थविद् डा. उमाशंकर साहले परराष्ट्र मामिला, सामाजिक लोकतन्त्र, संघीयताको कानूनी पक्ष, संघीयताभित्रको आर्थिक सवाल लगायतका विषयमा केन्द्रीय सदस्यहरुलाई प्रशिक्षण दिएका थिए ।
