काठमाडौं, ४ माघ । राष्ट्रपति कार्यालयले हिजो (बुधबार) नियुक्त भएका प्रदेश प्रमुखहरुको सपथ भोलि (शुक्रबार) गराउनेगरी तयारी थालेको छ।
औपचारिक निर्णय नभएपनि आगामी आइतबारसम्म प¥याउनुभन्दा भोलि नै सपथ खुवाउनु राम्रो हुने विश्वास लिएर राष्ट्रपति कार्यालयले नवनियुक्त प्रदेश प्रमुखहरुको सपथ भोलिको लागि तय गरेको स्रोतले जनायो ।
आइतबार प्रदेश प्रमुखले सपथ लिँदा निर्वाचन आयोगले राष्ट्रिय सभाका मतदाताको सूची बनाउन समेत समस्या हुने भएकाले भोलि नै प्रदेश प्रमुखको सपथ हुन लागेको हो ।
प्रदेशमा केन्द्रीय सरकारको प्रतिनिधिका रुपमा रहने प्रदेश प्रमुखलाई राष्ट्रपतिले सपथ खुवाउनुपर्छ। प्रदेश प्रमुखले प्रदेश सभा सदस्यलाई सपथ खुवाउने संवैधानिक व्यवस्था छ। सपथ खाएपछि उनीहरुको कार्यकाल सुरु हुन्छ।
सरकारले हिजोमात्रै १ नम्बर प्रदेशमा डा. गोविन्द सुब्बा, २ नम्बरमा रत्नेश्वरलाल कायस्थ, ३ नम्बरमा अनुराधा कोइराला, ४ नम्बरमा बाबुराम कुँवर, ५ नम्बरमा उमाकान्त झा, ६ नम्बरमा दुर्गाकेशर खनाल र ७ मोहनराज मल्ललाई प्रदेश प्रमुखमा नियुक्त गरेको थियो।
यता नवनियुक्त प्रदेश प्रमुखले भोलि सपथ लिने कार्यक्रम छ । तर, विभिन्न प्रदेशका विविध शहरहरुमा भने अहिले व्यापक ठूलो आन्दोलन चर्किएका छन् । खासगरी प्रदेश नम्बर १ को धनकुटामा, ५ को दाङमा, ७ को डोटीमा आन्दोलन जारी छ ।
कतिपय ठाउँमा त कांग्रेसका नेता तथा कार्यकर्ताहरुले नै आफ्नै सभापति एवम् प्रधानमन्त्री शेरबहादुर देउवाको पुत्ला जलाएका छन् ।