माघ २३, काठमाण्डौ । एकजना ज्योतिषले तयार पारेको वर्ष २०७५ को पात्रोले सरकारमा संकट आउने उल्लेख गरेको छ ।
ज्योतिष पण्डित सूर्यप्रसाद ढुंगेलले तयार पारेको ०७५ सालको सूर्य पञ्चाङ्ग पात्रोको ‘मासफल’ लाई पत्याउने हो भने आगामी असारबाट शासक वर्गमा तनाव एवं मतभेद देखा पर्ने भनि उल्लेख गरेको हो । त्यसबेलाको ‘शासक वर्ग’ भनेको सम्भवतः केपी ओली नेतृत्वको वाम गठबन्धन सरकार हो ।
पञ्चाङ्ग पात्रोमा बैशाखदेखि नै राजनीतिक क्षेत्रमा आन्तरिक विवादहरु देखा पर्ने भनिएको छ । मंसिरमा शासक वर्गमा मतभेद एवं वैमनस्य बढ्नेछ । र, शासन प्रणालीमा चित्त नबुझे्र कतै कतै जनसंघर्ष देखा पर्नेछ ।
सूर्य पाञ्चाङ्गमा पुस महिनाको मासफलको सुरुमै राष्ट्र प्रमुखहरुमा द्वन्द्व सुरु हुने उल्लेख गरिएको छ । तर, माघमा विश्वासको संकट टर्ने बताइएको छ ।
तर, फेरि फागुनको मासफलमा राजनेताहरुमा परस्पर विरोध बढ्ने दाबी गरिएको छ ।
०७५ साल चैतको मासफलमा भने राजनीतिक क्षेत्रमा देखिएको समस्याले निकास पाउने उल्लेख छ ।
पञ्चाङ्गमा उल्लेखित मासिक फल अनुसार ०७५ साल बैसाखमा महंगी बढ्ने, सेयर बजारमा अस्थिरता बढ्ने, अपराधका घटनाहरु बढ्ने अनि राजनीतिक क्षेत्रमा आन्तरिक विवादहरु बढ्ने छन् ।
असारमा जनता सुखी हुने, सुनचाँदी र भैंसीको मूल्य बढ्ने, घिऊ तेलको मूल्य स्थिर हुने, फलफूल र तरकारीको मूल्य आकाशिने अनि शासक वर्गमा तनाव र मतभेद बढ्ने पात्रोमा उल्लेख छ ।
पात्रोमा उल्लेख भएका यस्तो भविश्यवाणी विज्ञानसम्मत छ भनेर पुष्टि गर्न सकिँदैन । तैपनि हिन्दु संस्कृतिमा यस्ता कुरालाई राशीफलजस्तै गरी एउटा विश्वास एवं मान्यताका रुपमा लिइने गरिएको छ र नेपाली पात्रोमा हरेक वर्ष यसरी वार्षिक फल प्रकाशित गर्ने परम्परा रही आएको छ ।
ज्योतिषहरुले बताएको भविश्य एवं पञ्चाङ्ग पात्रोमा उल्लेख भएको वार्षिक फललाई कसैले पत्याउँछन् त कसैले विश्वास गर्दैनन् । तथापि प्रत्येक वर्ष पात्रो छापिँदा वर्षभरिको ‘फल’ उल्लेख गरिएको हुन्छ ।
