असार २, काठमाण्डौ । नेपाल कम्युनिष्ट पार्टीका नेता झलनाथ खनालले अहिले भइरहेको मूल्यवृद्धिको कारणहरुलाई गहिरिएर अध्ययन गर्न सरकारलाई सुझाब दिएका छन् ।
“मूल्यवृद्धि सरकारका लागि चुनौति हो । चुनौतिको रुपमा लिएर नियन्त्रणका लागि आवश्यक कदम तुरुन्त चाल्नुपर्छ ।” खनालले भने । “जनतालाई राहत दिने हिसाबले आवश्यक कदम चाल्नुपर्छ । यो सरकार जनताको हित र सबैप्रकारका दुःख कष्ट निवारण गर्नका लागि गठन भएको हो । सरकारले जे बोलेको छ त्यो गर्नैपर्छ ।”
नीति तथा कार्यक्रम र बजेटको कार्यान्वयन गर्नु अहिलेको सरकारको चुनौति भएको बताएका छन् ।
प्राइम टेलिभिजनको कार्यक्रम जनता जान्न चाहन्छन्मा ऋषि धमलासँग कुरा गर्दै नेता खनालले बजेटका आधारभूत सिद्धान्तहरु राम्रा भएको जिकिर गरे ।
बजेट वितरणमा सत्तापक्षका सासंदहरुले नै असन्तुष्टी जनाएको सन्दर्भमा भने खनालले आवश्यकताअनुसार सच्याउनुपर्ने सुझाब दिए ।
चुनावी घोषणपत्रमा जेष्ठ नागरिकलाई दिइने वृद्ध भत्ता रकम बढाएर मासिक पाँच हजार पुर्याउने उल्लेख गरिए पनि यसपटक किन बढाइएन भन्ने धमलाको प्रश्नमा खनाले भने, “हो, यही कुराले नै हामीले चुनाव जितेर आएका हौँ । यसलाई आगामी दिनमा ठीक ढंगले सम्बोधन गर्ने विषयमा अर्थमन्त्रीको ध्यान जानुपर्छ ।”
