बाबुरामलाई अमेरिकामा नेपालीले भने-‘नेपालका छोराछोरी मार्ने, मडरर गो ब्याक’

भदौ ३१, काठमाण्डौ । अमेरिका भ्रमणमा रहेका नयाँ शक्ति पार्टी नेपालका संयोजक डा. बाबुराम भट्टराईलाई हत्यारा भन्दै प्रदर्शन भएको छ । अमेरिकाको टेक्सास पुगेका डा. भट्टराई विरुद्ध त्यहाँ रहेका नेपालीले कालो झण्डा देखाएर मर्डरर गो ब्याक भन्दै प्रदर्शन गरेका हुन् ।

तत्कालीन माओवादीका नेता डा. भट्टराईलाई ‘हत्यारा’ भन्दै प्रदर्शनकारीले फर्किन माग गरेका थिए । उनीहरुले ‘मडरर गो ब्याक’ भन्दै नारा लगाए । उनीहरुले ‘नेपालका छोराछोरीलाई मार्ने, मडरर गो ब्याक’ भन्दै डा. भट्टराईलाई कालो झण्डा देखाएका थिए ।

डिसी मेट्रो एरियाबाट टेक्सास गएका डा. भट्टराई र उनकी श्रीमती तथा नेतृ हिसिला यमी विरुद्ध तत्कालीन माओवादी जनयुद्धका पीडितहरुले प्रदर्शन गरेका हुन् ।
डा. भट्टराई गैरआवासीय नेपाली संघको अन्तराष्ट्रिय समन्वय परिषद र राष्ट्रिय समन्वय परिषद अमेरिकाको कार्यक्रममा सहभागी हुन त्यहाँ पुगेका हुन् ।

भट्टराई प्राज्ञिक भ्रमणका लागि मंगलवार संयुक्त राज्य अमेरिका पुगेका हुन् । भट्टराईको अमेरिका भ्रमण अध्ययनमा केन्द्रित हुने बताइएको छ ।
भ्रमण पूरा गरी डा. भट्टराई असोज २२ गते नेपाल फर्किने छन् ।