काठमाडौं, ११ फागुन । सत्तारुढ दल नेपाल कम्युनिष्ट पार्टी (नेकपा) का अध्यक्षद्धय केपी शर्मा ओली र पुष्पकमल दाहाल प्रचण्डबीच पछिल्लो समय असाध्यै घनिष्ठ मिलन भएको छ ।
भेनेजुयला प्रकरणपछि एकाएक दुई अध्यक्षबीच सम्बन्ध बिग्रिएका खबरहरु सार्वजनिक भएका थिए । उनीहरु एक अर्काविरुद्ध खनिएका थिए । तर, प्रधानमन्त्री निवास बालुवाटारमा दुई अध्यक्षबीच तीन घण्टा एक्लाएक्लै मन माझामाझ भएपछि सबै कुरा मिलेको छ । उनीहरु एक अर्काको बखान र प्रशंसा गर्न पनि पछि हटेका छैनन् । सरकारको आलोचना गर्नुको साटो प्रचण्डले खुलेर प्रशंसा गरेका छन् ।
सरकार गठन भएको एक वर्ष पुगेको अवसरमा अध्यक्ष प्रचण्डले समिक्षा गर्दा सफल भएको नै दाबी गरेका थिए । धेरै ऐन तथा कानुन बनाउनु परेकोले सरकारको एक वर्षे कार्यकालमा जनताले अपेक्षा गरेका धेरै काम हुन नसकेको भएपनि अब द्रुत गतिमा काम देखा पर्ने प्रचण्डले विश्वास दिलाएका थिए ।
अचम्म त के भने प्रधानमन्त्री ओलीले प्रचण्डको साथ लिएर नै पार्टीका विभिन्न सांगठानिक एकता टुँगो लगाउन गठित कार्यदलले काम गर्न नसकेको भन्दै भंग गरिदिए । तर, अर्को पक्ष बरिष्ठ नेता माधव कुमार नेपाल पक्ष अध्यक्षद्धयसँग रुष्ट बन्यो । कार्यदल भंग गर्नेबारे ओलीले अध्यक्ष प्रचण्डबाहेक अरुसँग सल्लाह नै नगरेको नेकपानिकट उच्च स्रोतको दाबी छ ।
कार्यदल भंग गरेपछि माधव पक्ष रुष्ट बनेको छ । उनीहरुले सार्वजनिक रुपमै अध्यक्षद्धयको कार्यशैलीको विरोध तथा आलोचना गरेका छन् । तर, ओली र प्रचण्डले भने ती सबै आलोचनाहरुलाई पचाएर अघि बढ्ने रणनीति लिएका छन् । बालुवाटार स्रोतका अनुसार आजभोलि अध्यक्षद्धय ओली र प्रचण्डबीच नियमितजस्तो भेटवार्ता भैरहेको छ ।
