चैत १३, काठमाण्डौ । अख्तियार दुरुपायोग अनुसन्धान आयोगले भ्रस्टाचारका चर्चित मुद्दाहरुमा छानविन तथा अनुसन्धान प्रकृया अगाडि बढाएको छ ।
राज्यलाई अर्बौं रुपैयाँ हानि–नोक्सानी पुग्ने गरी भएका आर्थिक दुरुपयोगका उजुरी माथि आयोगले अनुसन्धान थालेको हो । तर भ्रष्टाचारका अझै धेरै मुद्धा र काण्डमाथि भने आँखा पुग्न सकेको छैन ।
पछिल्लो समय अख्तियार दुरुपयोग अनुसन्धान आयोगले केही ठूला भ्रष्टाचारसँग जोडिएका विषयमा चासो देखाउन थालेको छ । विगतमा ठूला माछा छोडेर सानालाई मात्र सिकार गरेको भन्ने आलोचना खेपेको अख्तियारले अहिले केही सक्रियता देखाएको छ ।
तर ठूला भनिएका भ्रष्टाचार काण्डप्रति जनचासो नै बढि भएकाले पनि अख्तियार चुप बस्न नसकेको हुन सक्छ ।
मेलम्ची खानेपानी आयोजनाका लागि ३८ करोड रुपैयाँ भुक्तानीको विषयमा अख्तियारले खानेपानी मन्त्रालयबाट फाइल झिकाइसकेको छ । निजी मेडिकल कलेजमा विद्यार्थीबाट बढी शुल्क असुलीको बिषयमा अख्तियारमा उजुरी परेको छ । यस विषयमा भने छलफल मात्रै भइरहेको अख्तियारले जनाएको छ ।
वाइडबडी जहाज खरिद प्रकरणमा नेपाली कांग्रेसका सभापति एवं पूर्वप्रधानमन्त्री शेरबहादुर देउवादेखि पूर्व तथा बहालवाला मन्त्रीको संलग्नता भएको उजुरीमाथि अनुसन्धान जारी छ । तर व्यक्तिगत रुपमा कसरी छानविन भइरहेको छ भन्ने कुरा चाँही अख्तियार प्रवक्ताले खुलाउन चाहेनन् ।
त्यस्तै मेलम्ची खानेपानी आयोजनामा बहालवाला मन्त्रीदेखि सत्तारुढ दलका शीर्ष नेताको स्वार्थ जोडिएको आशंकामा छानबिन जारी छ । नेपाल ट्रस्टको दरबारमार्ग, कमलादी र कालीमाटीको जग्गा निजी कम्पनीलाई सस्तोमा ३० वर्षका लागि लिजमा दिएको उजुरी पनि आयोगमा परेको छ ।
पहुँच र सत्ताको को आडमा भएका विभिन्न अनियमितताको छानबिन नगरेको आरोप अख्तियारमाथि लाग्दै आएको छ । तर अख्तियारका प्रवक्ता कोइरालाले भने अख्तियारको भूमिकाप्रति शंका गर्न आवश्यक नरहेको जिकिर गरे ।
पछिल्लो समय भ्रष्टाचारसम्बन्धी उजुरी बढेको छ । अघिल्लो आर्थिक वर्षमा कूल १९ हजार उजुरी परेको थियो । त्यसमध्ये १९४ वटा काण्डलाई अख्तियारले अदालती प्रक्रियामा पुर्याएको थियो । तर यस वर्ष यो तथ्याङ्क बढेको छ । सात महिनामै १६ हजार उजुरी परेको छ भने अख्तियारले २ सय काण्डलाई अदालतमा लगेको छ । यस वर्ष अख्तियारले आफ्नै पूर्व आयुक्त राजनारायण पाठकविरुद्ध पनि मुद्धा दायर गरेको छ ।
अख्तियारले आफ्नो भूमिका केही बढाएको जस्तो देखिए पनि नेपालमा हुने भ्रष्टाचार अन्त्यका लागि अझै धेरै काम गर्नु आवश्यक छ ।
सरकार, राजनीतिक दल र नेताहरुको प्रभावमा पर्दै आएको अख्तियार अब पनि निष्पक्ष बन्न सकेन भने भ्रष्टाचार मौलाइरहने छ । अन्य चर्चित र ठूला भ्रष्टाचारका मुद्दामा पनि जाल हालेर ठुला माछा समात्न अख्तियारले हात नकमाओस् ।
