काठमाडौँ, २२ वैशाख । नेपालगन्जमा ६० वर्षीय पुरुषमा कोरोना सङ्क्रमण पुष्टि भएको दुई दिनपछि थप ९ जनामा कोरोना भएको पुष्टि भएको छ ।
भेरी अस्पताल नेपालगन्जको प्रयोगशालामा आइतबार पिसिआर चेकजाँमा थप ९ जनामा कोरोना भएको पुष्टि भएको हो । नयाँ सङ्क्रमितहरू पहिलो सङ्क्रमितका परिवारका सदस्य र आफन्त हुन । जिल्ला स्वास्थ्य कार्यालय बाँकेका अनुसार कोरोना सङ्क्रमित व्यक्तिसँग प्रत्यक्ष सम्पर्कमा आएका घरपरिवारका सदस्य लगायत ९० जनाको शनिवार स्वाब सङ्कलन गरिएको थियो । त्यसमध्ये ३० जनाको परीक्षण गरिदा ९ जनामा कोरोना भएको पुष्टि भएको हो । भेरी अस्पतालका चिकित्सक डा। बद्री चापागाईँका अनुसार शनिवार सङ्कलन गरिएको मध्ये ६० जनाको स्वाबको परीक्षण कार्य चलिरहेको छ ।
सङ्क्रमित भएकालाई खजुरास्थित आईसुलेसन अस्पतालको रूपमा रहेको सुशील कोइराला प्रखर क्यान्सर अस्पतालमा लैजाने तयारी गरिएको छ । प्रहरीले पहिलो सङ्क्रमितको कन्ट्याक्ट ट्रेसिङ गर्दा गत चैत पहिलो साता सीमा पारी भारतको रुपैडिया–नानपारा पुगेर फर्केको पाइएको छ । प्रहरी श्रोतले भन्यो,–आप्mना बिरामी बुवालाई भेट्न पुगेका सङ्क्रमित लकडाउनको दुई दिन अघि मात्रै फर्किएको पाइएको छ । नेपालगन्जको डिएसपी रोडमा बस्ने पहिलो सङ्क्रमित करिब एक किलोमिटर टाढा रहेको महेन्द्रपार्कनजिकै रहेको अन्सारी यान मस्जिदको सहायकको रूपमा कार्यरत रहेको थियो । मस्जिद नजिकै मदरसामा विद्यार्थीलाई ट्युसन पढाउँदै आएको पाइएको छ । जिल्ला स्वास्थ्य कार्यालयले भने सङ्क्रमितले तीन महिनायता भारत नगएको बयान दिएको जनाएको छ ।
मस्जिदमा भारतीय र अन्य बाहिरी जिल्लाका व्यक्तिहरू आउने गरेको जानकारी दिएको कार्यालयले जनाएको छ । बाँकेका प्रमुख जिल्ला अधिकारी कुमारबहादुर खड्काले थप व्यक्तिमा सङ्क्रमण देखिएपछि सुरक्षा सावधानी अपनाइएको जानकारी दिएका छन् । पहिलो सङ्क्रमित व्यक्तिका परिवारका सदस्य, आफन्तमा नयाँ सङ्क्रमण देखिएको उनले जानकारी दिएका छन् । नयाँ व्यक्तिमा सङ्क्रमण देखिएपछि थप कन्ट्याक्ट ट्रेसिङको कार्य अघि बढाउँदैछौं, प्रमुख जिल्ला अधिकारी खड्काले भने,– आम नागरिकमा थप सचेत र सावधानी हुन अनुरोध गरेका छौँ । प्रशासनले यसअघि नै सङ्क्रमितको घर, मस्जिद लगायतका अन्य चार क्षेत्रमा सिल गरिसकेको छ ।
(गोरखापत्रबाट)
