एजेन्सी, २५ मंसिर । कोरोना भाइरसविरुद्धको रुसी भ्याक्सिन अहिलेसम्म विकास भएका भ्याक्सिनमध्ये सबैभन्दा बढी प्रभावकारी रहेको दाबी गरिएको छ । स्पुतनिक भी नामक उक्त भ्याक्सिन ९६.२ प्रतिशत प्रभावकारी रहेको दाबी गरिएको हो ।
भ्याक्सिनको नियमनकारी स्वतन्त्र कमिटिीका सदस्य रामिल खाब्रिएभले बिहिबार स्पुतनिक भी भ्याक्सिन दुवै डोज लगाएर परीक्षण गर्दा ९६.२ प्रतिशत प्रभावकारी पुष्टि भएको बताएका हुन् । रुसी समाचार संस्था तासका अनुसार वैज्ञानिकहरुको फोरममा रामिलले पहिलो र दोस्रो डोजको खोप लगाएपछिको अवस्था परीक्षणबाट प्रभावकारीताको प्रतिशत निकालिएको तर्क गरेका हुन् । उनले यसलाई थप पुष्टिका लागि तथ्यांक समेत पेश गर्ने बताएका छन् ।
स्पुतनिक भी सँसारमै पहिलोपटक विकास भई दर्ता भएको भ्याक्सिन हो । ११ अगष्टमा रुसमा दर्ता भएपछि यसको आकस्मिक परीक्षण शुरु गरिएको थियो । रुस भ्याक्सिनको सर्वसाधारणमा प्रयोग गर्ने पहिलो मुलुक बनिसकेको छ । उसले गत हप्ताबाट भ्याक्सिन प्रयोग गर्न शुरु गरिसकेको छ ।
फाइजर कम्पनिले विकास गरेको भ्याक्सिन सबैभन्दा बढी प्रभावकारी दाबी गरिएको थियो । मोर्डना र अक्सफोर्डले विकास गरेको भ्याक्सिन पनि प्रभावकारी रहेको मानिएको छ । तर, फाइजरको तुलनामा रुसी भ्याक्सिनको मूल्य कम छ । अहिलेसम्म विकास भएकामध्ये सबैभन्दा सस्तो अक्सफोर्ड भ्याक्सिन हुने देखिन्छ ।
