काठमाडौं, २८ कात्तिक । नेकपा एमालेका सचिव पृथ्वी सुब्बा गुरुङले पार्टीको महाधिवेशनमा केन्द्रीय हाइकमान्डले प्रतिनिधि नतोकेको बताएका छन् ।
आज नेपाली रेडियो नेटवर्कको कार्यक्रम नेपाली बहसका लागि पत्रकार ऋषि धमलासँग कुरा गर्दै नेता गुरुङले भने, ‘केन्द्रीय कमिटीले फलानो फलानोलाई प्रतिनिधिमा सर्वसम्मत ल्याऊ भनेको होइन । भावनात्मक, वैचारिक र मनोवैज्ञानिक एकताका साथ जाने भनेको हो ।
बहुमत र अल्पमतका आधारमा छनोट हुनु मात्र लोकतन्त्र होइन । सर्वसम्मति जोक होइन, यस्तो काम एमालेले मात्र गर्न सक्छ । सबैले हामीसँग सिक्नोस् ।’ पार्टी अध्यक्ष केपी शर्मा ओली कमान्ड भएको नेता भएकाले सर्वसम्मति हुन सकेको उनको दाबी छ ।
उनले थपे, ‘ओलीले पार्टीलाई एकढिक्का राख्दा अरूलाई किन डाहा हो ? उहाँले तानातान, हानाहान नगर भन्नुभएको हो । चुनावै नगर भन्नुभएको होइन ।’ पार्टी अध्यक्षमा फेरि पनि शतप्रतिशत ओली नै दोहोरिने निश्चित भएको सचिव गुरुङले बताए ।
उनले भने, ‘उम्मेदवारी त जसले पनि दिन सक्छ । तर हन्ड्रेड पर्सेन्ट ओली नै अध्यक्ष बन्नुहुन्छ । सर्वसम्मत भए पनि बहुमत भए पनि नेता हुने उहाँ नै हो ।’ पार्टी फोडेर, सरकार गिराएर जाने अनुशासनहीन नेताहरूको पार्टीलाई महाधिवेशनमा बोलाउनुको ओचित्य नहुने पनि उनले बताए । उनले भने, ‘माधव नेपाल अहिले हामीलाई नै गाली गरिरहनुभएको छ । झिँगाको श्रापले डिङो मर्दैन । उहाँको श्रापले हामीलाई केही फरक पर्दैन ।’
