चितवन, मंसिर १३ । नेकपा (एमाले)को दशौं महाधिवेशन अन्ततः चुनावी प्रकृयाबाटै टुङ्गिने भएको छ । महाधिवेशन अध्यक्ष मण्डलका अध्यक्ष केपी शर्मा ओलीले लामो समयको गृहकार्यपछि बन्दसत्रमा सहमतिको प्रस्ताव गरेका पदाधिकारी तथा सदस्यको सूचिमा आम सहमति नभएपछि चुनावी प्रकृयामा जाने भएको हो ।
अध्यक्ष ओलीले आईतबार दिनभरीको गृहकार्यपछि आज विहान करीव १ बजे बसेको बन्दसत्रमा पदाधिकारी तथा सदस्यहरुको सूचीको प्रस्ताव पेश गरेका थिए ।
बन्दसत्रले सो प्रस्ताव अनुमोदन गर्ने सन्दर्भमा उपाध्यक्ष भीम रावलले असहमति जनाउदै अध्यक्षमा आफ्नो उमेदवारीको दावी कायमै रहेको बताएपछि निर्वाचनमा जान परेको हो ।
अध्यक्ष ओलीले सहमति नगरेमा निर्वाचनको विकल्प खुला रहेको जनाएका थिए । बन्दसत्रमा अध्यक्ष मण्डलका अध्यक्ष ओलीले सहमतिका लागि भन्दै ३ सय १ जनाको नामवली सार्वजनिक गरेका छन् ।
यसैगरी १९ जना पदाधिकारीको सूची समेत अध्यक्ष ओलीले प्रस्ताव गरेका छन् । ओलीले अध्यक्षमा आफ्नै नाम र बरिष्ट उपाध्यक्षमा इश्वर पोखरेल र महासचिवमा शंकर पोखरेललाई सहमतिका लागि प्रस्ताव गरेका छन् ।
अध्यक्षमा भीम रावलको उमेदवारीसंगै अन्य पदहरुमा समेत सहमति नजनाउनेहरुको उमेदवारी पर्न सक्ने देखिएको छ । बन्दसत्रबाट बाहिरिंदै नेता रावलले लोकतान्त्रिक विधि र मान्यता अनुसार चुनाव हुनुपर्ने बताएका छन् ।
यसैबीच, पार्टीको निर्वाचन आयोगले आज विहान ८ बजेदेखि उम्मेदवार हुन इच्छुक महाधिवेशन प्रतिनिधिहरुलाइ फारम वितरण गर्ने र साँडे ९ बजे भित्र उम्मेद्वारी दर्ता गर्ने समय निर्धारण गरेको छ ।
त्यसपछिको १५ मिनेट दावी विरोधको समय दिएको छ भने १० बजेर ५५ मिनेटसम्म दावी विरोध परे त्यसमा निर्णय गरेर पुनः नामावली प्रकाशन गर्नेछ ।
मध्यान्न १२ बजेसम्म उम्मेद्वारी फिर्ता नलिए १२ बजेर ५ मिनेट भित्र उम्मेदवारको अन्तिम नामावली प्रकाशन गरी राती ९ बजेबाट मतदान शुरु हुनेछ ।
मतदानको लागि मंसिर १४ गते विहान ३ बजेसम्मको समय दिइएको छ । महाधिवेशनमा २ हजार १ सय ५३ जनाले मतदान गर्ने केन्द्रिय निर्वाचन आयोगले जानकारी दिएको छ ।
