काठमाडौं, १५ मंसिर । वाई–वाई यु–१९ पुरुष राष्ट्रिय क्रिकेट प्रतियोगितामा सुदुरपश्चिम प्रदेशले तेस्रो जित निकालेको छ ।
मुलपानी क्रिकेट मैदानमा भएको खेलमा प्रदेश १ लाई ६ विकेटले पराजित गर्दै सुदुरपश्चिमले फाइनल यात्रा बलियो बनाएको छ ।
जितका लागि चाहिएको ९१ रनको लक्ष्य सुदुरपश्चिमले ३१ ओभरमा ४ विकेट गुमाउदै पुरा गरेको थियो ।
सुदुरपश्चिमलाई जित दिलाउन वसन्त कार्कीले अविजित रहदै सर्वाधिक ३७ रन जोडे । यस्तै, अर्जून साउदले अविजित ३२ रनको जोड्न सफल भएका थिए ।
प्रदेश १ का अभिनय राजवंशीले सर्वाधिक २ तथा श्रवन किस्कु र अंकित सुवेदीले एक–एक विकेट लिए ।
यस अघि टस हारेर पहिले ब्याटिङ गरेको प्रदेश १ केवल २४ ओभरमा अलआउट हुदै मात्र ९० रन जोडेको थियो ।
प्रदेश १ का कप्तान अंकित सुवेदीले सर्वाधिक ६१ रनको जोडेका थिए । तर, अन्य खेलाडीले दोहोरो रन जोड्न सकेनन् ।
सुदुरपश्चिमका शेर मल्लले सर्वाधिक ४ विकेट हात पारे भने नरेन्द्र साउदले ३ विकेट लिए ।
साथै, कैलाश ऐरीले २ विकेट लिए ।
सुदुरपश्चिमले फाइनल प्रवेशका लागि अन्तिम खेल बागमती प्रदेशविरुद्ध शुक्रबार खेल्नेछ ।
प्रदेश १ ले पनि पाँचमध्ये तीन खेल जित्दै फाइनलको सम्भावना कायमै राखेको छ । तस्विरः क्यान
