काठमाडौं, ५ चैत्र। पूर्व प्रहरी महानीरिक्षक अच्युतकृष्ण खरेलले विदेशीको इसारामा प्रलोभनमा परेर नेपालका राजनीति नेतृत्वले हिन्दु राष्ट्र हटाएको आरोप लगाएका छन् । शनिबार हिन्दु राष्ट्र जागरण अभियानले आयोजना गरेको प्रबुद्व नागरिक गोष्ठी तथा साहित्य विमोचन कार्यक्रममा बोल्दै देशमा हिन्द राष्ट्र पुनःस्थापना अनिवार्य भएको बताए ।
‘विदेशीको इशारामा प्रलोभनमा परी राजनीतिक नेतृत्वमा पुगेकाहरुले हिन्दु राष्ट्र हटाए,’ पूर्वआइजीपी खरेलले भने । उनले सँसारमा धर्मसापेक्ष राष्ट्रहरु भएको उल्लेख गर्दै राज्यको धर्म हुँदैन भन्नेहरुले भ्रम छरिरहेको बताए ।
यो संसारमा सबैको धर्म रहेको उल्लेख गर्दै भने, ‘जसरी पानिको आफ्नो धर्म छ, खुर्सानी पिरो हुने धर्म छ, आगोको पोल्ने धर्म छ , बोटविरूको पनि धर्म हुन्छ त्यसैगरी मान्छे र राष्ट्रको धर्म हुनु पर्छ ।’ नेपालमा धर्ममाथि प्रहार गर्ने षड्यन्त्रका साथ धर्मनीरपेक्षको विषय थोपिएको तर्क गरे । उनले प्रश्न गरे,’कसले भनेको राष्ट्रको धर्म हुदैन ?’
नेपालका राजनीतिक गर्ने पण्डितहरूलाई खुल्ला रूपमा धर्मको बारेमा सिकाउनु र पढाउनुपर्ने कुरामा जोड दिए । खरेलले एसियाका कयौं देशको परापुर्वकालमा हिन्दु देश भएकोले धर्मलाई अतिक्रमण गरेर ती देशहरू एउटा टापु र नाम मात्रको देश रहेको बताए । देश र भुगोल हाम्रो हातबाट गयो भने त्यसलाई फिर्ता ल्याउन सकिने तर धर्म र संस्कृति गुम्यो भने त्यसलाई फिर्ता ल्याउन नसकिन भएकोले हामी सबै सचेत भएर धर्म संस्कृतिको संरक्षण र जागरणमा लाग्नु पर्ने बताए । उनले अरूको धर्म जतिनै राम्रो भए पनि आफ्नो धर्म छाडनु नहुने र धर्म छाडेमा भयावह अवस्था हुने बताए ।
राजनीतिक नेतृत्वले लोभ र प्रलोभनमा परी विदेशीको आडमा, इसारामा देशको धर्म बेचेको भन्दै त्यसको निन्दा गर्दै एक मात्र हिन्दु राष्ट्र नेपाल हटाएकोमा आपत्ती जनाए ।
पूर्व प्रधानन्यायाधीश गोपाल प्रसाद पराजुलीले धर्मनीरपेक्षताका कारण नेपालीको सभ्यता नै संकटमा परेको भन्दै हिन्दु राष्ट्र अपरिहार्य भएको बताए । उनले सभ्यता, संस्कृति र परम्परा नै संकटमा परेको बताए।
‘हामि विस्तारै धर्मबाट अलग हुँदै जाँदा, थिचिदै, मिचिदै र पापि हुँदै गईरहेको र संविधानमा धर्मनिरपेक्षता भन्ने शब्द लेखे पछि अझ मुखरित गरेकोले धर्मनिरपेक्षता भन्ने शब्दले हामीलाई शंकुचनमा पारेको छ,’ पराजुलीले भने । उनले देशलाई संकटमा धकेल्ने गरी परिस्थिति विकास भइरहेको बताउँदै भने, ‘धर्मनिरपेक्षता हामीलाई चाँहिदैन ।’ सरकार हिन्दु राष्ट्र अभियानविरुद्ध प्रस्तुत भएमा आफूहरु पेन्सन छोड्न तयार रहेको तर धर्म , संस्कार र संस्कृति छाड्न नसक्ने बताए । उनले हिन्दु राष्ट्र जागरण अभियानमा सबै लाग्नु पर्नेमा जोड दिए ।
हिन्दु धर्म भन्दा सर्वकृष्ट अरू कुनै पनि धर्म विश्व नभएकोले यो विश्वको सबै भन्दा राम्रो मानवताको कल्याण गर्ने धर्म भएको बताए । उनले भने, ‘हामी हिन्दु भएकोमा गर्व गर्नुपर्छ ।’
विगतमा राष्ट्रको सेवा गर्ने सम्पूर्ण उच्च तह र ओहोदका व्यत्तिहरूले हरी वंश पुरायणलाई छोएर सम्पूर्ण बालबच्चालाई स्मरण गर्दै सपथ लिने गरेको स्मरण गराउँदै अहिले सबै हटाउँदै गएकोमा असन्तुष्टि व्यक्त गरे । विश्वका सबै राष्ट्रमा त्यस देशको धर्म ग्रन्थ लिएर सपत गर्ने प्रचलन रहेको र अमेरिकी राष्ट्रपतिले पनि निर्वाचन भए पश्चात् चर्चमा गएर प्रार्थना पछि बाइबल हातमा लिएर सपथ खाएको कुरा जोडदै राष्ट्रका उच्चतहका र ओहोदाका व्यत्तिहरूले गीता लिएर सपथ लिनका लागि अनुरोध गरेका छन् ।
नेपाली सेनाका पूर्व उपरथी नरबहादुर कँडेलले नेपालललाई विश्वका हिन्दुहरूले पवित्र तीर्थस्थलको रूपमा हेर्ने हुँदा धार्मिक पर्यटनको विकास गर्दै पुनस् हिन्दु राष्ट्र घोषणा आवश्यक रहेको बताए ।
नेपाल प्रहरीका पूर्व एआइजी कल्याण कुमार तिमिल्सिनाले हिन्दु राष्ट्र जागरण अभियानको बारेमा बताउदै नेपालीको संस्कृति र हिन्दुत्वको स्वभिमानि भाव जगाउन यो अभियान सुरू गरेको बताए ।
डा वासुदेव कृष्ण शास्त्रीको सभापतित्व भएको कार्यक्रममा विश्लेषक देवेश झाको समेत उपस्थिति रहेको थियोे । नागरिक गोष्ठीमा जागरण अभियानको लागि प्रकाशित पुस्तक,स्टिकर तथा फोल्डरको पुर्ण परिचयको साथै विमोचन पनि गरिएको छ । राष्ट्रिय सभागृहमा सुसम्पन्न भएको प्रबुद्ध नागरिक गोष्ठी कार्यक्रममा ६ सय न्दा बढी समाजका प्रबुद्ध व्यत्तिहरूको उपस्थिति रहेको थियोे ।
