काठमाडौं, ३१ असार । प्रतिनिधि सभाको उपसभामुख चयनका लागि मतदान प्रक्रिया सुरु हुँदैछ ।
उपसभामुखको लागि सत्ता गठबन्धनबाट पुष्पा भुसाल र प्रमुख प्रतिपक्षी दल नेकपा एमालेबाट विद्या भट्टराई चुनावी मैदानमा छन् ।
नेपाली कांग्रेसकी भुसाललाई गठबन्धनसहित लोसपाको पनि समर्थन रहेको छ । लोसपाको प्रतिनिधि सभामा १३ सांसद रहेका छन् ।
प्रतिनिधिसभाको शुक्रबारको दोस्रो बैठक सुरु भएको हो । शुक्रबार बसेको पहिलो बैठकले नेपाल नागरिकता (पहिले संशोधन) विधेयक २०७९ माथि विचार गरियोस् भन्ने प्रस्तावलाई बहुमतले स्वीकृत गरेको थियो ।
यसपछि फेरि शुक्रबार नै बसेको दोस्रो बैठक जारी छ । उक्त बैठक सभामुख चयन प्रक्रियामा प्रवेश गरेको छ ।
माओवादी केन्द्रका प्रमुख सचेतक देवप्रसाद गुरुङले पुष्पाको नाम प्रस्ताव गरेका हुन् ।
एमालेबाट विद्या भट्टराई उपसभामुखको उम्मेदवार बनेकी छन् । भट्टराईलाई निर्वाचित गरियोस् भन्ने प्रस्ताव शान्ता चौधरीले राखिरहेकी छन् ।
