काठमाडौं, १ मंसिर । सत्ता गठबन्धनका मुख्य दलहरु नेपाली कांग्रेस, नेकपा (माओवादी केन्द्र), नेकपा (एकीकृत समाजवादी) र राष्ट्रिय जनमोर्चाका सभापति एवम अध्यक्षहरूले गठबन्धन दलका उम्मेदवारहरुलाई अत्यधिक बहुमतले विजयी गराउन संयुक्त अपिल गरेका छन् ।
आज (बिहीबार) कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाल र राष्ट्रिय जनमोर्चाका अध्यक्ष चित्रबहादुर केसीले संयुक्त अपिल जारी गर्दै गठबन्धनको जित सुनिश्चित् भएको बताएका छन् ।
संयुक्त अपिलमा भनिएको छ–‘लोकतान्त्रिक वाम गठवन्धनका पक्षमा देशभर जनलहर आएको र नेता कार्यकर्ता उत्साहित भएर सहभागी हुनु भएबाट गठबन्धनको विजय सुनिश्चित रहेको हामीले महसुस गरेका छौं। यो अभियानलाई निरन्तरता दिँदै आम मतदातालाई मतदानमा सहभागी गराउन पार्टीका साथीहरु एवं शुभेच्छुकहरुमा हार्दिक अपील गर्दछौं ।’ यसअघि शीर्ष नेताहरुले छुट्टाछुट्टै अपिल पनि जारी गरेका थिए ।
