Logo

भ्रष्टाचारले डामिएका मुख्यसचिव अर्यालमाथि एक्शन लिने अख्तियारको अन्तिम तयारी



काठमाडौं, २० फागुन । टेरामक्स प्रविधि घोटालामा बहालवाला स्वास्थ्यमन्त्री मोहनबहादुर बस्नेत र मुख्यसचिव डा. बैकुण्ठराज अर्यालमाथि नै भ्रष्टाचार मुद्दा दायर हुन लागेको छ । अख्तियार दुरुपयोग अनुसन्धान आयोगमा बयान दिएर आएका स्वास्थ्यमन्त्री बस्नेत र मुख्यसचिव अर्यालले राजीनामा नदिँदा यस्तो अवस्था आएको हो ।

मुख्यसचिव नै भ्रष्टाचारमा मुछिएको र अख्तियारमा बयान दिने अवस्था आउनु भनेको प्रशासनिक क्षेत्रको शीर निहुरिनु भएको भनेर पूर्व प्रशासकहरुले गुनासो पोख्न थालेक ाछन् । सम्भवतः नेपालको इतिहासमै बहालवाला मुख्यसचिवमाथि भ्रष्टाचार मुद्दा दायर हुन लागेको हो । मुख्यसचिव डा. अर्याललाई अख्तियारमा बयान दिन गएको बेलै अख्तियारका उच्च अधिकारीले मार्गप्रशस्त गर्दा राम्रो हुने सुझाव दिएको स्रोतको दाबी छ । तर, उनले उल्टै अख्तियारका पदाधिकारीलाई सर्वोच्च अदालतको संवैधानिक इजलासबाट हटाउने चलखेलमा लागे । यद्यपि मुख्यसचिव डा. अर्यालको चलखेल सफल हुन सकेन ।

अख्तियार उच्च स्रोतकाअनुसार विकल पौडेल र सुनिल पौडेल जस्तै डा. अर्याललाई पनि हिरासतमा लिएर अनुसन्धान गर्नुपर्ने अवस्था छ । तर, मुख्यसचिव कै कुर्सीमा बसिरहेकाले अख्तियार ‘पर्ख र हेर’ स्थितिमा देखिन्छ । १ महिनादेखि मुख्यसचिव डा. अर्यालले अख्तियारको सुझाव लत्याएकाले अब भने एक्सन लिने अख्तियारको तयारी रहेको बुझिन्छ ।

अख्तियारले टेरामक्समा आज÷ भोलि नै भ्रष्टाचार मुद्दा लैजान लागेको छ । यस्तै, अन्य मुद्दा पनि तयारी अवस्थामै छन् । नेसनल पेमेन्ट गेटवे सिस्टम र अकुत सम्पत्ति आर्जनमा पनि मुख्यसचिव अर्यालमाथि अनुसन्धान अन्तिम चरणमा पुगेको स्रोतको दाबी छ ।

नेपाल टेलिकमको बिलिङ सिस्टमदेखि नेपाल आयल निगमको बोनस वितरण घोटालासम्ममा मुख्य सचिव अर्याल अख्तियारको छानबिनमा रहेका छन् । अहिलेको समग्र अवस्था हेर्दा र विष्लेषण गर्दा मुख्यसचिव डा. अर्यालले स्वास्थ्यमन्त्री बस्नेतले जस्तो अटेर नगरी तत्काल पदबाट राजीनामा दिए निजामती प्रशासनका लागि ठूलै योगदान हुने देखिन्छ । file photo



प्रतिक्रिया दिनुहोस्