काठमाडौं, साउन १३ । नारागणगढ–मुग्लिन सडकखण्डको सिमलतालबाट पहिरोसँगै त्रिशूली नदीमा खसेका दुई बस र बसमा सवार यात्रुको खोज तथा उद्धार कार्य रोकिने भएको छ । दुई बस त्रिशूलीमा बेपत्ता भएको १७ दिन पुग्दापनि भेट्न नसकिएपछि खोजी कार्य रोक्ने तयारी भएको हो ।
नारायणगढ(मुग्लिन सडकखण्डको सिमलतालमा काठमाडौंबाट रौतहटको गौर जाँदै गरेको र वीरगञ्जबाट काठमाडौं जाँदै गरेको बस लेदो माटोसहितको पहिरोले बगाएर त्रिशुलीमा खसालेको थियो। दुवै बसमा रहेका कुल ६५ यात्रुमध्ये ३ जना हामफालेर बाँच्न सफल भए भने २० जनाको शव भेटियो, खोजीका क्रममा भेटिएका ४ वटा शवको अझै सनाखत भएको छैन अरु बाँकी यात्रु बेपत्ता छन्।
त्रिशूली नदीमा खसेका दुई बस र बसमा सवार यात्रुको खोज तथा उद्धार कार्यमा साउन ५ गतेदेखि भारतीय टोली पनि परिचालन भएको थियो । अब भारतीय टोली पनि भारत फर्किने तयारीमा छ भने नेपालको टोलीले पनि खोजी कार्यलाई रोक्नेछ।
नेपालको स्रोत साधनले बसको अवस्था पत्ता लगाउन नसकेपछि सरकारले खोजीका लागि तीन वटा अत्याधुनिक सोनार उपकरणसहितको भारतीय उद्धार टोली मगाएको थियो । हाल बेपत्ता यात्रुको खोजीमा दैनिक दुई सय सुरक्षाकर्मी खटिदै आएका थिए ।
