![](https://reportersnepal.com/wp-content/uploads/2018/08/Shekhar-Koirala-768x375.png)
काठमाडौं, २७ साउन । प्रमुख प्रतिपक्षी दल नेपाली कांग्रेसका नेता डा. शेखर कोइरालाले वर्तमान सरकार सस्तो लोकप्रियता कमाउन बढि केन्द्रित भएको आरोप लगाएका छन् ।
प्राईम टाईम्स टेलिभिजनको नियमित कार्यक्रम “ जनता जान्न चाहन्छनमा “ पत्रकार ऋषि धमलासँग कुरा गर्दै कोइरालाले यस्तो आरोप लगाएका हुन् ।
भौतिक पूर्वाधार तथा यातायातमन्त्री रघुवीर महासेठले सिण्डिकेट अन्त्य भैसक्यो भनेर खोकेपनि अझैपनि सिण्डिकेट कायमै रहेको उल्लेख गर्दै उनले भने, “यो सरकार कति कमजोर रहेछ भन्ने कुरा पुष्टि भयो । सरकारको प्रतिरक्षा गर है भनेर प्रधानमन्त्रीले मन्त्रीहरुलाई भन्नुभयो । हामीले कहाँ देशलाई भताभुंग बनायो ?”
https://www.facebook.com/primetimestvnepal/videos/253467768615674/
सरकारका गलत क्रियाकलाप र कदमविरुद्ध आफ्नो पार्टीले सडकभन्दापनि सदनबाटै संघर्ष गर्ने पनि कोइरालाले बताए । अबको लडाईँ सडकमा भन्दापनि संसदमा गर्नुपर्ने उनको भनाई छ ।
सरकारले राम्रो काम गरे कांग्रेसले सदैव सहयोग र समर्थन गर्नेपनि उनको भनाई छ । “सहयोग भनेको के हो ? “-उनले भने । गलत गर्नेलाई आफूहरुको सहयोग नरहने उनको जिकिर छ । आर्थिक समृद्धि र विकासको कामप्रति सरकारलाई आफ्नो पार्टीको पूर्ण समर्थन हुने पनि कोइरालाले विश्वास दिलाए ।
भारतसँगको आफ्नो पार्टीको सम्बन्ध खराब नरहेको उनको दाबी छ । उनले भने,”हामीहरुको सम्बन्ध त्यस्तो बिग्रिएको छैन ।”