निर्मला हत्या : बबिता र रोशनी पक्राउ, एसपीका छोरा र मेयरका भतिज पनि पक्राउ पर्ने सम्भावना

भदौ ९, काठमाण्डौ । निर्मला पन्तको हत्याको अनुसन्धान गर्ने क्रममा प्रहरीले शनिबार बिहान बबिता बम र रोशनी बमलाई पक्राउ गरेको छ ।

उनीहरु दिदी बहिनी हुन् । भीमदत्त नगरपालिका वडानम्बर १८ स्थित आफ्नै घरबाट बम दिदी बहिनी पक्राउ परेका हुन् ।

निर्मला पन्त सोही घरमा गृहकार्य गर्न गएका बेला वेपत्ता भएकी थिइन् । सो घरमा उनी आफूसँग पढ्ने साथी १८ वर्षीया रोशनीलाई भेट्न गएपछि बेपत्ता बनेकी हुन् । निर्मलाको बलात्कार हत्याको घटनामा उनीहरुको संलग्नता वा थप जानकारी हुन सक्ने आशंकामा प्रहरीले उनीहरुलाई पक्राउ गरेको हो ।

यसअघि प्रहरीले उनीहरुलाई सुरक्षाका लागि कार्यालयमा राखे पनि हिरासतमा लिएको थिएन ।

घरमा बबिता र रोशनी मात्रै बस्दै आएका थिए । उनीहरुको परिवार दार्चुलामा बस्दै आएका थिए । निर्मलाको हत्यापछि भने बाबुआमा सोही घरमा आएर बस्दै आएका छन् ।

निर्मला हराएको दिन साउन १० गते अपराह्न पाँच बजे निर्मलाकी आमाले सो घरमा पुगेर छोरीबारे खोजतलास गर्दा बबिताले उनी दुई बजे नै त्यहाँबाट हिँडेको दाबी गरेका थिए ।

त्यसबेला बबिताले निर्मला पोइल गइहोला’ भन्ने जवाफसमेत दिएकी थिइन् ।

भोलिपल्ट बिहान उखुबारी छेउमा निर्मलाको साइकल फेला परेपछि बबिताले ‘लास पनि त्यतै होला’ भनेको पीडित परिवारको दाबी छ ।

दुई जना मात्रै बस्दै आएको उक्त घरमा बम दिदी बहिनीलाई भेट्न एसपी डिल्लीराज विष्टका छोरा र मेयर सुरेन्द्र विष्टका भतिज प्रायजसो आइरहने गरेको स्थानीयबासीको भनाइ छ ।

प्रहरीले यही विषयमा बुझ्नका लागि उनीहरुलाई पक्राउ गरेको हो ।

सम्बन्धित समाचार :