काठमाडौं, ७ पुष । सत्तारुढ दल नेपाल कम्युनिष्ट पार्टी (नेकपा) का प्रवक्ता नारायणकाजी श्रेष्ठले अबको पाँच वर्ष नै केपी शर्मा ओली यो देशको प्रधानमन्त्री हुने स्पष्ट पारेका छन् । यो बीचमा नेकपाका अर्का अध्यक्ष पुष्पकमल दाहाल प्रचण्ड प्रधानमन्त्री बन्ने कुनै सम्भावना नै नरहेको पनि उनले जिकिर गरेका छन् ।
शनिबार राति प्राईम टाईम्स टेलिभिजनको लागि पत्रकार ऋषि धमलासँग कुरा गर्दै प्रवक्ता श्रेष्ठले यस्तो बताएका हुन् । त्यस्तै उनले पार्टीको जारी स्थायी समिति बैठकमा सरकारको आलोचनामात्रै नभएर राम्रा कामको बारेमापनि समिक्षा भैरहेको जानकारी दिए । सरकारले गरेका राम्रा कामहरुको सबै नेताहरुले एकजुट भएर प्रचारप्रशारपनि गर्नुपर्छ भनेर नेताहरुले धारणा राखेको उनले सुनाए ।
