काठमाडौं, ४ माघ। लेभान्तेलाई पाखा लगाँउदै बार्सिलोना स्पेनिस कप अर्थात कोपा डेल रे फुटबलको क्वाटरफाइनलमा प्रवेश गरेको छ । पहिलो लेगमा २–१ ले पराजित भएको बार्सिलोनाले गएराती भएको दोस्रो लेगको खेल ३–१ ले जित हासिल गरेको हो ।
समग्रमा ४–२ को जित निकाल्दै बार्सा अन्तिम आठमा पुगेको हो । गएरातिको खेलमा बार्सिलोनालाई विजयी गराउन ओस्मान डेम्बेलेले दुई तथा लियोनल मेस्सीले एक गोल गरे ।
खेल जिते पनि बार्सिलोनामाथि पहिलो लेगमा अयोग्य खेलाडी खेलाएको आरोप लागेको छ । आरोप प्रमाणित भएको खण्डमा बार्सिलोना जारी प्रतियोगिताको लागि अयोग्य हुने सम्भावना छ ।
यसअघि सन् २०१५ मा प्रतिबन्धित खेलाडी खेलाएको आरोप प्रमाणित भएपछि रियाल मड्रिडलाई अयोग्य घोषणा गरिएको थियो ।
