काठमाडौं, १७ चैत । नेपालका लागि भारतीय राजदुत मञ्जिभसिंह पुरीले रिपोर्टर्स क्लब नेपाल २० औं वर्ष पूरा गरी २१ औं वर्षमा प्रवेश गरेकोमा बधाई दिए ।
रिपोर्टर्स क्लब नेपालको २१ औं वार्षिकोत्सवको अवसरमा काठमाडौंको राष्ट्रिय सभागृहमा आइतबार आयोजित विशेष समारोहमा सम्बोधन गर्दै उनले भने,‘आगामी दिनमा पनि क्लबले सशक्त भूमिका निर्वाह गरोस् । क्लब २१ वर्षमा प्रवेश गरेको छ । क्लब र यसका परिवारप्रति गर्व छ । खासगरी ऋषिजीप्रति सम्मान छ ।’
राजदुत पुरीले पत्रकार धमलालाई जुझारु पत्रकारको रुपमा चित्रण गरे । उनले भने,‘लोकतन्त्र, प्रेस स्वतन्त्रता र विधिको शासनको पक्षमा ऋषिजीले ठूलो काम गर्दै आउनुभएको छ। मानव जातिको विकासको लागि यी कुराहरु महत्वपूर्ण छ ।’
रिपोर्टर्स क्लब सबैको लागि उपयुक्त प्लाटफर्म भएको उनको तर्क छ । उनले भने,‘क्लबमा स्वतन्त्र, निश्पक्ष र आक्रामक साक्षात्कार हुन्छ । फेस–टु–फेश हुने मौका मैले पनि पाएको छु।’ उनले क्लब अझै प्रगतिको बाटोमा अघि बढोस भन्दै शुभकामना दिए ।
