काठमाडौं, १० वैशाख । नेपालमा कोरोना संक्रमितको संख्या ४२ पुगेको छ । मंगलबार उदयपुरको भुल्केस्थित मस्जिद क्षेत्रका थप ११ जनामा कोरोना संक्रमणको पुष्टि भएसँगै कुल संक्रमितको संख्या ४२ पुगेको स्वास्थ्य मन्त्रालयका प्रवक्ता डा. विकास देवकोटाले बताएका छन् ।
यसअघि कुल ३१ जनामा संक्रमण रहेको आज ११ जनाको थप पुष्टि भएसँगै कुल संख्या ४२ पुगेको हो । यसमा उदयपुरका मात्र २३ जनामा संक्रमण देखिएको छ । केन्द्रिय प्रयोगशालामा उदयपुरबाट ल्याइएको २६० जनाका स्वाब मध्ये साँझसम्म २४० जनाको परीक्षण गर्दा तीन जनामा पोजेटिभ देखिएको र २० जनाको स्वाब परीक्षण भईरहेको स्वास्थ्य तथा जनसंख्या मन्त्रालयले विज्ञप्ति मार्फत् जानकारी गराएको छ । उदयपुरको भुल्केस्थित मस्जिदमा भारतबाट आएका १२ भारतीय नागरिकमा वैशाख ५ गते संक्रमण पुष्टि भएको र त्यसको भोलिपल्ट सो मस्जिदमा रहेका एक नेपालीको संक्रमण पुष्टि भएर १३ जना पुगेको थियो । सो क्षेत्रमा एकै पटक धेरै संक्रमित पाइए पछि शनिबर कोशी अस्पतालबाट गएको चिकित्सक टोलीले ६९ जनाका स्वाब संकलन गरी परीक्षण गर्दा आठ जनामा संक्रमण पाइएको थियो ।
साथै, ती आठ जनाको संक्रमण पुनः पुष्टि गर्न सो नमुना धरानस्थित बीपी कोइराला स्वास्थ्य विज्ञान प्रतिष्ठनमा पुनः परीक्षण गर्दा संक्रमण भएको पुष्टि भएको थियो । यसैगरी, उदयपुरको सो मस्जिद क्षेत्रबाट नेपाली सेनाले शनिबार र आइतबार स्वाब संकलन गरी परीक्षणका लागि काठमाडौं ल्याएको थियो । (गोरखापत्रबाट)
