काठमाडौं, १७ वैशाख । नेपालमा कोरोना भाइरस संक्रमित संख्या ५७ पुगेको छ । आज तीनजना संक्रमित थपिएको स्वास्थ्य तथा जनसंख्या मन्त्रालयले जनाएको छ ।
संक्रमितहरु बाराका दुईजना र पर्साका एकजना छन् । उनीहरु जमातीसँग सम्बन्धित हुन् । स्वास्थ्य मन्त्रालयका अनुसार संक्रमितहरु यसअघि पर्सामा संक्रमित भेटिएका तीनजना भारतीय नागरिकसँगै दिल्लीबाट फर्किएका हुन् ।
संक्रमित पर्साका ४६ वर्षीय पुरुष हुन् । बाराका ३१ र ४३ वर्षीय पुरुष हुन् । उनीहरु सीमराको क्वारेन्टाइनमा रहेको अवस्थामा परीक्षणका क्रममा संक्रमित भेटिएका थिए । उनीहरुको नारायणी अस्पतालमा उपचार भइरहेको स्वास्थ्य मन्त्रालयका प्रवक्ता डा. विकास देवकोटाले जानकारी दिए ।
