नेपाल कम्युनिस्ट पार्टीका अध्यक्ष केपी शर्मा ओलीले तत्कालिन नेकपा एमालेको नवौं महाधिवेशनमा अध्यक्ष पदमा बाजी नमारेको भए नेपालको राजनीतिको अहिलेको अवस्था नै फरक हुन्थ्यो । यो आफैमा परिकल्पना होला तर ओली निकै कठिन चुनाव जितेर तत्कालिन नेकपा एमालेको अध्यक्षमा निर्वाचित भएका थिए ।
एमालेको चुनावमा ओलीका प्रतिद्धन्द्धी माधवकुमार नेपाल थिए । पार्टीलाई लामो समय नेतृत्व गर्दै आएका नेपालले ओलीलाई पराजित गर्ने आँकलन गरिएको थियो । महाधिवेशनको अन्तिम अवस्थासम्म नेपाल एक सय मतले अगाडि रहेको आँकलन गरिएको थियो । बामदेव गौतम ओलीको समर्थनमा खुलिसकेका थिए । तैपनि, नेपालको पल्लाभारी थियो ।
ओली पक्षधरले टाउको गन्दै चुनाव अगाडि नै हिसाब निकालिरहेका थिए । अन्तमा ५० मतले पछाडि रहेको हिसाब निस्कयो । त्यसपछि ओलीले फेरि बामदेवको सहयोग मागे । अर्का प्रभावशाली नेता झलनाथ खनाललाई फकाउन सके मात्र चुनाव जितिने अवस्था बन्यो । ओली आफैले भनेर झलनाथ मान्नेवाला थिएनन् । त्यसका लागि बामदेवको साथ लिइयो ।
असारको अन्तिम हप्ता नेकपा महाधिवेशन चलिरहेको थियो । मतदानमा जाने निश्चित भइसकेको थियो । बामदेवले असारको अन्तिम हप्ताको एक रात साँढे १० बजे सम्पर्क गरी झलनाथ खनाललाई पुल्चोकथित मन्त्रिनिवासको आफ्नो क्वार्टरमा बोलाए । केपी शर्मा ओलीका विश्वापात्र एक नेता पनि पुगे । बामदेवले तीन घन्टा भन्दा बढी खनालसँग छलफल गराए । खनालका पनि आफ्नै शर्त थिए । भविष्यमा मिलेर जाने र महत्वपूर्ण पदमा अवसर आउँदा एक अर्कालाई सहयोग गर्नेसम्मको उधारो सहमतिहरु भए । खनाल रातको २ बजे घर फर्किए । बामदेवका कारण पासा पल्टियो । एक रातअघिसम्म चुनावी अंकगणितमा पछाडि रहेका ओली अगाडि पर्ने माहोल तयार भयो ।
भित्री सहमति अनुसार खनालका विश्वासपात्रहरुले माधवकुमार नेपाललाई मत दिएनन् । बाँकी नेपाल पक्षधर पदाधिकारी र केन्द्रीय सदस्यमा मत दिएपनि मतपत्रमा अध्यक्ष पदमा खाली राखेर मतदान गरे । यसरी ५७ जति मत माधव नेपाल पक्षधरको खाली नै गयो । प्यानललाई मत हालेपनि अध्यक्ष पदमा खाली राखेर ब्यालेटमा खसालियो । खाली नराखी माधव नेपाललाई मत गएको हुन्थ्यो भने जित उनकै हुन्थ्यो ।
३९ मतले माधवकुमार नेपाल केपी शर्मा ओलीसँग पराजित भएका थिए । ओलीले १००२ मत ल्याउँदा माधव नेपालले ९६३ ल्याएका थिए । ३१ असार २०७१ मा मतगणना सकिँदा अध्यक्ष पदमा खाली राखेर प्यानललाई मतदान गरिएको मतपत्रको चर्चा चल्यो । यसले निकै खैलाबैला भयो । अन्तिम समयमा झलनाथ खनालले माधव नेपाललाई असहयोग गरेको विषय चर्चामा आयो । वास्तवमा भएको यही थियो । यसमा बामदेव गौतमको मुख्य भूमिका थियो ।
अहिले गौमले यही योगदान नबिर्सन भन्दै केपी शर्मा ओलीलाई सजग गराएको बुझिएको छ । गौतमले बेला बेलामा ओलीलाई महत्वपूर्ण समयमा साथ दिने गरेका छन् । तत्कालिन एमालेको अध्यक्षको चुनाव, संसदीय दलको चुनाव देखि हालैको अध्यादेशमा विवादमा पर्दा समेत साथ दिए । तर, गौमम छ पटक धोका भइसकेको भन्दै ओलीलाई विश्वास गरिहाल्ने अवस्थामा नरहेको बुझिएको छ । गौतमलाई यसपटक विश्वसनीय आधार तयार नभएसम्म ओलीलाई साथ नदिने निकटस्थले सम्झाएको बुझिएको छ ।
गौमलाई ओलीले प्रधानमन्त्री बनाउने सम्मको प्रस्ताव गरेका छन् । तर, प्रतिनिधिसभा सदस्य नभएका गौतम प्रधानमन्त्री बन्न संविधान बाधक रहेको छ । यसका लागि संविधान नै परिवर्तन गर्नुपर्ने हुन्छ जुन ओलीबाट होस् भन्ने गौतम चाहन्छन् । जुन उनले पार्टीको हाइकमाण्ड बैठक र एक्ला एक्लै बैठकमा राख्ने गरेको बुझिएको छ ।-File Photo
