काठमाडौं, जेठ ३। बिहीबार राती धुलिखेल अस्पतालमा मृत्यु भएकी २९ वर्षीया सुत्केरीको शव दास्रो रिपोर्ट नआउदै पशुपतिस्थित विद्युतीय शवदाह गृहमा अन्त्येष्टी गरिने भएको छ।
धुलिखेल अस्पतालमा मृतकको आरडिटि र पिसिआर रिर्पोट पोजेटिभ आए पनि शुक्रराज ट्रपिकल तथा सरुवा रोग महाशाखामा भइरहेको परिक्षणको रिपोर्ट भने आउन बाँकी रहेको स्वास्थ्य मन्त्रालयले जनाईसकेको छ । स्वास्थ मन्त्रालयले उनको दास्रो परिक्षणको रिपोर्ट यो समाचार तयार पार्दा सम्म सार्वजनिक गर्न सकेको छैन् ।
सिन्धुपाल्चोक बाह्रबिसे नगरपालिका ९ की २९ वर्षीया सुत्केरी कोरोना संक्रमित भएर मृत्यु भएपछि स्वास्थ्य मन्त्रालयको टोली शनिबार धुलिखेल अस्पतालमा पुगेर छलफलसमेत गरेको थियो । शनिबार बसेको जिल्ला सुरक्षा समितिको बैठकले समेत छलफल पश्चात मृतक महिलाको गाँउ सिल गर्न नेपाली सेना, नेपाल प्रहरी तथा सशस्त्र पहरीलाई निर्देशन दिइसकेको छ ।
मृतक महिलाका श्रीमान, सासु तथा नन्दको समेत स्वाव संकलन गरिएको छ । प्रहरी स्रोतका अनुसार मृतको शव अन्तिम संस्कारकोलागि शववाहनमार्फत पशुपतिमा रहेको विद्युतिय शवदाह गृहमा ल्याउने तयारी भइरहेको छ । उनको अन्तिम संस्कारसमेत सुरक्षा निकायबाट नै हुने जनाइएको छ ।
वैशाख २३ गते शिक्षण अस्पताल महाराजगञ्जमा भर्ना भएर २४ गते नर्मल डेलिभरी भएपछि उनी २५ गते डिस्चार्ज भएर घर गएकी थिइन । घरमा पुगेपछि ज्वरो, स्वासप्रश्वासलगायत शारीरिक समस्या आएपछि परिवारले उनलाई धुलिखेल अस्पतालमा ल्याइएको थियो ।
