एजेन्सी, २८ पुस। अमेरिकी राष्ट्रपति डोनाल्ड ट्रम्पविरुद्ध महाअभियोग प्रस्ताव पेश भएको छ । गत हप्ता क्यापिटल हिलमा भएको हिंसामा राष्ट्रपति ट्रम्पको भुमिकालाई लिएर डेमोक्रेटिक पार्टीले उनका विरुद्ध महाअभियोग प्रस्ताव पेश गरेको हो ।
ट्रम्पलाई हिंसा भड्काएको आरोप लगाइएको छ र अमेरिकी संसद क्यापिटल हिलमा भएको आक्रमण पनि ट्रम्पकै उक्साहटमा भएको दाबी गरिएको छ ।
सभामुख नेन्सी पेलोसीसहित धेरैजसो डेमोक्रेटिक पार्टीका सांसद र अन्य नेताहरुले समेत ट्रम्पलाई उनको कार्यकाल समाप्त हुनुअघि नै ह्वाइट हाउसबाट निकाल्न चाहेका छन् ।
महाअभियोग प्रस्तावमा राष्ट्रपतिको निर्वाचन परिणाम उल्टाउन जर्जियाका अधिकारीहरुलाई दबाब दिएको विषय पनि उल्लेख छ ।
महाअभियोग प्रस्तावमाथि बुधबार छलफल हुने बताइएको छ ।
सुरुमा डेमोक्रेटिक पार्टीका सदस्यहरुले सोमबार अमेरिकी संविधानको धारा २५ प्रयोग गरेर उपराष्ट्रपति माइक पेन्स र मन्त्रिमण्डलका सदस्यहरुलाई ट्रम्पलाई हटाउन माग गरेका थिए। डेमोक्रेटिक पार्टीका सदस्यहरुले सोमबार फेरि ट्रम्पलाई हटाउने कोसिस गरेका हुन् ।
महाअभियोग प्रस्ताव पास गर्न माथिल्लो सदनमा पनि दुई तिहाई बहुमत चाहिन्छ । तर माथिल्लो सदनबाट महाअभियोग प्रस्ताव पास हुनेमा डेमोक्रेटिक पार्टीका सांसदहरु नै विश्वस्त नरहेको बताइएको छ ।
राष्ट्रपति ट्रम्पको कार्यकाल २० जनवरीमा सकिँदै छ । त्यही दिन नवनिर्वाचित राष्ट्रपति जो बाइडनले शपथ ग्रहण गर्दैछन् । मेरोलगानी/Photo: Agency
