एजेन्सी, २३ असार । नेदरल्यान्डका चर्चित क्राइम रिपोर्टर पिटर आर डी भ्राइजमाथि गोली प्रहार भएको छ । उनीमाथि मङ्गलबार विहान एम्स्टरडममा गोली प्रहार भएको हो ।
गम्भीर अवस्थामा भ्राइजलाई अस्पताल पुर्याइएको अन्तर्राष्ट्रिय समाचार संस्थाले जनाएका छन् । टीभी शोमा देखिएको केही मिनेटमै उनलाई सिटी सेन्टर नजिक गोली प्रहार भएको थियो ।
६४ वर्षीय भ्राइजलाई नजिकबाट ५ गोली हानिएको थियो । स्थानीय मिडिया रिपोर्ट अनुसार उनको टाउकोमा पनि गोली लागेको छ ।
प्रहरीले गोली प्रहारमा संलग्नताको आशंकामा ३ जनालाई पक्राउ गरेको छ । उनीहरुमध्ये दुईजनालाई कारबाट पक्राउ गरिएको थियो ।
नेदरल्यान्डमा अपराधसम्बन्धी सनसनीपूर्ण समाचार खोजेर भ्राइज चर्चित थिए । उनलाई प्रहरीले यसअघि सुरक्षा पनि दिएको थियो । उनलाई समाचारकै कारण थ्रेट आइरहन्थ्यो ।
