एजेन्सी । लिभरपुलका स्ट्राइकर मोहम्मद सलाह चम्केपछि इजिप्ट अफ्रिका कप अफ नेसन्सको सेमिफाइनलमा प्रवेश गरेको छ । आइतबार बेलुकी भएको खेलमा मोरोक्कोलाई अतिरिक्त समयमा २-१ गोलले पराजित गर्दै इजिप्टले सेमिफाइनलमा क्यामरुनसँगको भेट पक्का गरेको हो ।
क्यामरुनमा भएको खेलमा इजिप्टलाई जित दिलाउन मोहम्मद सलाह र ट्रेजेगुएटले एक/एक गोल गरे । मोरोक्कोको लागि सोफिएने बोउफलले एक गोल गरे । खेलमा लिएको शुरुवाती अग्रता जोगाउन नसक्दा मोरोक्को पराजित हुन बाध्य भयो । पहिलो हाफको सातौं मिनेटमा बोउफलले गोल गर्दै मोरोक्कोलाई शुरुवाती अग्रता दिलाएका थिए । ५३ औं मिनेटमा मोहम्मद सलाहले गोल गर्दै इजिप्टलाई बराबरीमा ल्याए ।
बाँकी निर्धारित समयमा दुवै टोलीबाट थप गोल नभएपछि खेल अतिरिक्त समयमा धकेलिएको थियो । अतिरिक्त समयको दसौं मिनेटमा सलाहको पासमा ट्रेजेगुएटले गोल गर्दै इजिप्टलाई २-१ गोलको जीत दिलाए । जीतसँगै इजिप्ट सेमिफाइनलमा प्रवेश गर्दा पराजित मोरोक्को क्वाटरफाइनलबाटै घर फर्किएको छ ।
