सन् २००१ को सेप्टेम्बर ११ मा विश्व इतिहासमा खतरनाक आतंकवादी हमला भयो ।अमेरिकाको न्युयोर्कस्थित विश्व व्यापार संगठनको जुम्ल्याहा भवनमा अपहरण गरिएका दुईवटा विमान पालैपालो ठोक्काइएको थियो ।
अन्तराष्ट्रिय आतंकवादी संगठन अलकायदाले जिम्मेवारी लिएको घटनामा झण्डै तीन हजार मानिस मारिए । अमेरिकाले ठूलो क्षति व्यहोर्यो । घटनामा योजनावद्ध तरिकाले पाइलट तालिम गर्न पठाइएका युवकहरुको संलग्नता पाइयो । उनीहरुले आत्मघाती हमला गरेका थिए । युवकहरुमध्ये अधिकांश साउदी नागरिक थिए ।
हमलामा अल कायदाको मात्र नभई साउदी अरेबियाको संलग्नताबारे समेत छानविन गरियो । अलकायदा नेता विन लादेन साउदी अरेबियाका नागरिक हुनुले मात्र त्यसो गरिएको होइन । साउदी अधिकारीहरु समेत घटनामा जोडिएको विषय बाहिर आयो । ती अधिकारीबारे अहिलेसम्म कुनै खुलासा भएको छैन । तर, अब अमेरिकाको अनुसन्धान निकाय एफबिआईले ती नामको खुलासा गर्ने भएको छ । दुई अधिकारीको नाम खुलिसकेको अवस्थामा अर्का अधिकारी ठूलै ओहदाको भएको हल्ला चलेको छ । ती व्यक्ति साउदी राजपरिवारका सदस्य हुनसक्ने हल्ला चलेको अन्तर्राष्ट्रिय समाचार संस्थाहरुले जनाएका छन् ।
अमेरिकाको न्यायिक निकाय र एफबिआईले नाम कहिले सार्वजनिक गर्ने नभनेपनि निर्णय गरिसकेको अन्तर्राष्ट्रिय समाचार एजेन्सीहरुले जनाएका छन् । त्यो नाम सर्वप्रथम अदालतमा पुग्नेछ र त्यसपछि ज्यान गुमाएका मानिसहरुको परिवारमा पुग्नेछ । ती व्यक्ति साउदी राजपरिवारको सदस्य हुन् भने त्यसले साउदी अरेबियालाई ठूलो झड्का पर्न सक्छ ।
पीडित परिवारहरुकै माग बमोजिम नाम खुलासा गर्न दबाब परेको हो । यसअघि दुईजनाको नाम खुलिसकेको छ । जसमध्ये फहद अल थुमेरी र ओमार अल बयोमी छन् । उनीहरुल त्यतिबेला अमेरिकास्थित साउदी दूतावासमा कार्यरत थिए ।
साउदी अरेबियाको सरकारी अधिकारी घटनामा जोडिएको भनिएको छ । घटनामा संलग्न १९ जना आत्मघातीहरुमध्ये १५ जना साउदी नागरिक थिए । हमलाका लागि साउदीबाट सहयोग पुगेको विषय पनि नआएको होइन । साउदी गुप्तचर अधिकारीबाट सहयोग पुगेको विषय चर्चामा आयो । घटनामा ठूलो धनराशी खर्च भएको खुलिसकेको छ । योजनाहरुबारे धेरै तथ्य बाहिर आएपनि मुख्य योजनाकारबारे अझै जानकारी बाहिर आउन सकेको छैन ।-एजेन्सी
