काठमाडौँ २२ मङ्सिर : नेपालगञ्जको कोहलपुरस्थित ट्रकले बालिकालाई ठक्कर दिएपछि उक्त क्षेत्र तनावग्रस्त भएको छ । ना २ ख ९४५९ नम्बरको ट्रकले भे ६ प २७४० नम्बरको स्कुटरलाई ठक्कर दिँदा १२ वर्षकी प्रकृति चन्द गम्भीर घाइते भएकी हुन् ।
कोहलपुरको त्रिभूवन उच्च मावि नजिकै दुर्घटना भएको थियो । दुर्घटना हुन साथ् आक्रोशित विद्यार्थीले ट्रकलाई तोडफोड गरेर ट्रकलाई जलाइदिएका छन् ।
विद्यार्थीहरुले नेपालगञ्ज–कोहलपुर रुटमा चलेका दर्जन गाडीमा तोडफोड गरेका छन् । प्रहरीले भीड नियन्त्रण गर्न लाठी चार्ज गरेको छ ।
विद्यार्थीलाई प्रहरीले लाठी चार्ज गरेपछि आक्रोशित स्थानीय बासिन्दा र अभिभावक पनि भीडमा मिसिएका थिए । प्रहरीले भीडलाई हटाउन हवाई फायर समेत गरेका थिए । ठूलो भीडले प्रहरीलाई लखेट्दै इलाका प्रहरी कार्यालय अगाडि पुर्याएका छन् । झडपमा केही प्रहरी र विद्यार्थी घाइते भएका जनाइएको छ । तनाबका कारण कोहलपुर बजार भने आज बन्द भएको छ । प्रहरीले थप टोली मगाएर भीडलाई नियन्त्रण गर्ने प्रयास गरेको छ ।
