काठमाडौँ, २ पुस । नेपाली काँग्रेसका नेता एवं तत्कालीन संविधानसभा सदस्य सूर्यविनायक नगरपालिका–५ कटुञ्जे निवासी रामेश्वर ढुङ्गेलको ६० वर्षको उमेरमा हिजो निधन भएको छ । मस्तिष्कघात भएपछि गत आइतबारदेखि शिक्षण अस्पताल महाराजगञ्जको सघन उपचार कक्षमा उपचारत उनको हिजो दिउँसो ३ः१५ बजे निधन भएको स्थानीयवासी रामहरि थापाले जानकारी दिए।
विसं २०७० सालको दोस्रो संविधानसभाको निर्वाचनमा भक्तपुर क्षेत्र नं २ बाट संविधानसभा सदस्यमा निर्वाचित ढुङ्गेलको हिजै पशुपति आर्यघाटमा दाहसंस्कार गरिएको ढुङ्गेलका भतिजा रञ्जनराज ढुङ्गेलले जानकारी दिए । विसं २०१६ असार २९ गते कटुञ्जेमा जन्म भएका उनले २०४० सालदेखि राजनीतिमा सक्रिय रहँदै २०४३, २०४८ र २०५४ सालमा तत्कालीन कटुञ्जे गाविसका अध्यक्षसमेत निर्वाचित भएको थियो । उनले कटुञ्जे घट्टेखोला खानेपानी आयोजनाको अध्यक्ष भएर कटुञ्जेका बासिन्दालाई खानेपानी खुवाएपछि उहाँलाई पानी पिताका रुपमा समेत स्थानीयवासीले मान्दै आएका थिए ।
गणेशमान स्मृति वाटिका प्रतिष्ठानका अध्यक्षसमेत रहनु भएका ढुङ्गेलका तीन छोरा छन् भने श्रीमती सुशीलाको गतवर्ष निधन भएको थियो । ढुङ्गेलको निधनप्रति गहिरो दुःख व्यक्त गर्दै नेपाली काँग्रेस भक्तपुरले श्रद्धाञ्जलि व्यक्त गरेको छ ।
गोरखापत्र दैनिकबाट
