स्वास्थ्यकर्मी धमला ‘कोभिड-१९ नियन्त्रण हिरो’ बाट सम्मानित

काठमाडौं, १५ फागुन । धादिङ नेत्रावती डबजोङ गाउँपालिकाले आफ्नो आठौं गाउँ सभा २०७७ तथा चौथो हिउँदे अधिवेशनमा स्वास्थ्यकर्मी मधु धमला क्षेत्रीलाई सम्मान गरेको छ । कोभिडविरुद्ध अग्रपँक्तिमा रहेर उत्कृष्ट सेवा गरेको भन्दै धमलालाई सम्मान गरिएको हो । कोरोना कहरको बेलामा पनि धमलाले स्वास्थ्य जोखिम मोलेर उत्कृष्ट सेवा प्रदान गरेका थिए ।

धमला कोडिभ १९ महामारी, लकडाउनको अवधिमा पनि जिल्लामा नै अग्रपँक्तिमा खटिएका छन्। उनले कोभिड नियन्त्रण तथा रोकथामा महत्वपूर्ण भूमिका निर्वाह गरेका थिए । र, सधैं नै स्वास्थ्य सुधारका कार्यक्रमसहित कार्यान्वयनमा खरो उत्रिएका थिए । कार्यक्रममा बोल्ने वक्ताहरुले धमलालाई धादिङको स्वास्थ्य क्षेत्रका मेरुदण्डको रुपमा चित्रण गरेका थिए । उनीहरुले धमलाले जस्तै देशभरिका स्वास्थ्यकर्मीहरुले आ–आफ्नो जिम्मेवारी बहन गर्नुपर्ने पनि धारणा राखेका थिए । धमलालाई कोभिड १९ नियन्त्रण हिरोको रुपमा सम्मान गरिएको हो ।