काठमाडौं, भदौ ६ । नेपाली कांग्रेसका नेता प्रदीप पौडेलले पार्टीमा पुस्ता हस्तान्तरणका लागि चौधौं महाधिवेशन कोसेढुंगा हुने बताएका छन् । मूल नेतृत्वबाहेक अन्य पदमा तेस्रो पुस्ताको वर्चस्व रहने उनको दाबी छ ।
पौडेलले भदौ १८ बाट वडा अधिवेशन सुरु हुनेमा दुबिधा नभएको पनि बताए । उनले क्रियाशील सदस्यतासम्बन्धी प्रतिवेदन आजै सभापति शेरबहादुर देउवालाई बुझाउने र निर्वाचन निर्देशिका छाप्न गइसकेकाले महाधिवेशनको टुंगो लागेको उनको भनाइ छ ।
उनले सत्ताप्रधान सोचका कारण व्यवस्थामाथि नै प्रश्न दल उठ्ने पनि बताए । उनले थपे, “दल विभाजनसम्बन्धी अध्यादेश केपीले ल्याउँदा बेठीक, देउवाले गर्दा कसरी ठीक हुन्छ ? सत्ता नै प्रधान बनाउनु गलत हो । यो केपी ओलीकै प्रवृत्तिको निरन्तरता हो । संविधान बनाउने नेताहरु नै किन यस्तो चाहिरहनुभएको छ ? हामीलाई थाहा छ, अध्यादेश गठबन्धनको दबाबका कारण आयो । तर ओलीलाई अध्यादेशको विरोध गर्ने नैतिकता छैन ।” अध्यादेशका कारण उनले अस्थिरता र अराजकता बढेर नेपाली कांग्रेसमै पनि विभाजन आउन सक्ने खतरा औंल्याए ।
