काठमाडौं, १९ फागुन । सहिद स्मारक ‘बी’ डिभिजन लिग फुटबलमा श्री कुमारी क्लब र नयाँ बस्ती युथ क्लब बराबरीमा रोकिएका छन् ।
एन्फा कप्लेक्स सातदोबाटोमा भएको खेलमा श्री कुमारी र नयाँ बस्तीले २–२ गोलको बराबरीमा रोकिएका हुन् ।
खेलको २२औं मिनेटमा अबय धिमालले गोल गर्दै नयाँ बस्तीलाई सुरुआती अग्रता दिलाएका थिए ।
तर, ४८औं मिनेटमा सृजन राज गौतमले गोल गर्दै श्री कुमारीलाई बराबरीमा ल्याए ।
६८औं मिनेटमा सुमन योज्ञाले गोल गर्दै नयाँ बस्तीलाई २–१ को अग्रता दिलाए ।
तर, खेलको ८७औं मिनेटमा नीर बहादुर आलेले गोल गर्दै श्री कुमारीलाई २–२ गोलको बराबरीमा ल्याउँदै टोलीलाई हारबाट जोगाए ।
यस बराबरीसँगै दुबै टोलीले एक÷एक अंक बाँढेका छन् ।
