काठमाडौं,१२ माघ। आईसीसी यू-१९ विश्वकपको पहिलो चरणको आफ्नो अन्तिम खेलमा नेपालले अफगानिस्तानविरुद्ध शानदार सुरुवात गरेको छ ।
पहिला ब्याटिङ गरिरहेको अफगानिस्तानले १० ओभरमा ५ विकेट गुमाएर ३४ रन जोडेको छ । आकाश चन्दले ४ र गुल्सन झाले एक विकेट लिए ।
अफगानिस्तानका विकेटकिपर नुमान शाह र खालिद तानिवालले खाता नखोली आउट भए । सोहेल खान जुरमतीले ४ रन जोडे भने ओपनर जमसिद जद्रानले पनि ३ रन मात्र बनाउन सके । आकाशले ५ ओभरमा ८ रन मात्र खर्चिएका थिए ।
नेपालले आजको खेलमा टोलीमा दुई परिवर्तन गरेको छ । दीपक बोहरा र तिलकराज भण्डारीलाई खेलाएको छ ।
दुबै टोली समूह ‘डी’ मा अंक विहीन छन् । यस खेलको विजेता टोली सुपर सिक्स र पराजित हुने टोलीले १३ देखि १६ औं स्थानको लागि प्लेअफ खेल्नुपर्ने हुन्छ ।
