काठमाडौं, ६ जेठ । स्पेनिस लिग फुटबलको अन्तिम खेलमा बार्सिलोना बराबरीमा रोकिएको छ । गएराति भएको खेलमा च्याम्पियन बार्सिलोनालाई आइबारले २–२ गोलको बराबरीमा रोकेको हो ।
आइबारको मैदानमा भएको खेलमा घरेलु टोलीले पहिलो गोल गरे पनि बार्साका लियोनल मेस्सीले दुई गोल गर्दै ३२ औं मिनेटमा टोलीलाई अग्रता दिए । ४५ औं मिनेटमा आइबारका डे ब्लासिसले एक गोल फर्काउँदै खेल बराबरी गरेका हुन् ।
बराबरीसँगै बार्सिलोनाले ३८ खेलबाट ८७ अंकका साथ सो सिजनको लिग सकाएको छ । गएराति भएको अर्को खेलमा रियाल बेटिसले रियाल मड्रिडलाई २–० ले हराएको छ । आफ्नै मैदानमा बेटिसलाई विजयी गराउन मोरोन र रुईजले एक–एक गोल गरे ।
गएरातिका खेलसँगै स्पेनिस लिग फुटबलको यो सिजन सकिएको छ । यसपटक च्याम्पियन बार्सिलोनासँगै एथ्लेटिको मड्रिड, रियाल मड्रिड र भ्यालेन्सिया च्याम्पियन्स लिगका छनोट भए । अंक तालिकाको पुछारमा रहेका जिरोना, हुएस्का र रायो भायकानो भने दोस्रो श्रेणीमा झरे ।
एजेन्सीको सहयोगमा
