ताप्लेजुङ, मंसिर १८। ताप्लेजुङस्थित कञ्चनजङ्घा आधार शिविर क्षेत्रका होटल पर्यटक नआएपछि सुनसान बनेका छन् । पर्यटनलाई नै आधार बनाएर खुलेका होटल यस वर्ष कोरोना भाइरस कोभिड–१९ का कारण पर्यटकको आवागमन नहुँदा सुनसान बनेका हुन् ।
कञ्चनजङ्घा आधार शिविर क्षेत्रअन्तर्गत ताप्लेजुङको फक्ताङ्लुङ गाउँपालिका–६, लेलेपको सेकाथुम, जापानटार, थाङ्ग्याम, अम्जिलेसा, ग्याब्ला, फले, घुन्सा, खम्बाचेन र लोनाकजस्ता ठाउँमा खुलेका होटल सुनसान बनेका छन् ।
विश्वको तेस्रो अग्लो हिमाल कञ्चनजङ्घासहित यहाँको पर्यटकीय स्थलको भ्रमण जाने पर्यटकलाई लक्षित गरी यस क्षेत्रमा मोटो रकम लगानी गरेर होटल सञ्चालनमा ल्याइएका छन् ।
विगतका वर्षमा बाह्य तथा आन्तरिक पर्यटकले खचाखच हुने यस क्षेत्रका होटल यो वर्ष सुनसान बनेका घुन्साका स्थानीय मिङ्माडन्डु शेर्पाले बताए । कोरोना महामारीपछिको बन्दाबन्दीले पर्यटक आवागमन ठप्प हुँदा करोडौँ लगानी गरेर सञ्चालनमा ल्याइएका होटल व्यवसायी नराम्री मारमा परेका शेर्पाले बताए ।
आधार शिविर क्षेत्र अर्थात् अम्जिलेसा, ग्याब्ला, फले, घुन्सालगायत ठाउँका बासिन्दाको मुख्य पेसा नै होटल व्यवसाय भएकाले व्यवसाय ठप्प हुँदा यस क्षेत्रका बासिन्दा तथा व्यवसायीलाई निकै समस्या परेको उनको भनाइ छ ।
घुन्साका स्थानीय होटल व्यवसायी पेमा शेर्पाले यस वर्ष पर्यटकको उपस्थिति नहुँदा आपूmहरूलाई निकै समस्या भएको बताए। आम्दानीको स्रोत नै होटल व्यवसाय भएको र यो वर्ष व्यवसाय ठप्प भई आम्दानी गुम्नाले घरव्यवहार साथै दैनिकी चलाउनलाई नै धौधौ परिरहेको शेर्पाको भनाई छ ।
होटलको लगानी साथै होटल ठप्प हुँदा खरिद र ढुवानीसमेत महँगो रकम खर्चिएर पु¥याइएका उपभोग्य वस्तु बिक्री गर्न नपाउँदा यसपालि ठूलै घाटा बेहोर्नुपर्ने अवस्था आएको शेर्पाले बताएको आजके गोरखापत्र दैनिकमा खवर ।
