यो सरकार जति दिन रहन्छ, देश त्यति नै अनिश्चितताको भूमरीमा फस्ने पक्का : शेखर कोइराला

काठमाडौं, २९ माघ । प्रमुख प्रतिपक्षी दल नेपाली कांग्रेसका प्रभावशाली नेता डा. शेखर कोइरालाले वर्तमान सरकार जति रहन्छ त्यति नै देश अनिश्चितताको भूमरीमा फस्ने दाबी गरेका छन् । नेपाल कम्युनिष्ट पार्टी (नेकपा) दाहाल–नेपाल समूहकी नेतृ रामकुमारी झाँक्रीलाई प्रहरीले आज पक्राउ गरेपछि उनले यस्तो बताएका हुन् । उनले झाँक्रीले अलोकतान्त्रिक र असंवैधानिक कदमविरुद्ध बोलेकै भरमा नेकपाकी नेतृ झाँक्रीलाई पक्राउ गरेर सरकारले सर्वसत्तावादी र अधिनायकवादी चरित्र देखाएको पनि टिप्पणी गरेका छन् । उनले झाँक्रीलाई पक्राउ गरिएकोमा भत्र्सना गर्दै तत्काल रिहाईको माग पनि गरेका छन् ।

कोइरालाले सामाजिक सञ्जाल ट्विटरमार्फत लेखेका छन्–‘अलोकतान्त्रिक र असंवैधानिक कदम बिरुद्ध बोलेकै भरमा नेकपाकी नेतृ रामकुमारी झाँक्रीलाई पक्राउ गरेर सरकारले सर्वसत्तावादी र अधिनायकवादी चरित्र देखाएको छ।यो सरकार जति दिन रहन्छ,देश त्यति नै अनिश्चितताको भुमरीमा फस्ने पक्का छ। झाँक्री पक्राउको भर्त्सना गर्दै तत्काल रिहाईको माग गर्दछु।”