एजेन्सी, ३० फागुन । बलिउड सुपरस्टार आमिर खान गत वर्ष किरण रावसँगको सम्बन्धविच्छेदको खबरका कारण चर्चामा आएका थिए । सामाजिक सञ्जालमा आमिरको अरु कसैसँग अफेयर रहेको दाबी गरिएको थियो । अब उनी तेस्रो विवाह गर्ने मुडमा छन् । यही अफेयरका कारण उनले किरण रावसँग सम्बन्धविच्छेद गरेको समेत भनिएको थियो । यी सबै खबरमा आमिरले अहिले मौनता तोडेका छन् ।
आमिर खानले आफ्नो १५ वर्ष पुरानो विवाह र किरण रावसँगको सम्बन्धविच्छेदबारे मुख खोलेका छन् । हालै एक कुराकानीका क्रममा आमिरले आफ्नो जीवनका धेरै रहस्य खुलाएका छन् । किरणकै कारणले पहिलो श्रीमती रीना दत्तसँग सम्बन्धविच्छेद नगरेको अभिनेताले बताए । बरु रीनासँग अलग हुँदा उनको जीवनमा अरु कोही थिएन । उनले किरणलाई चिनेको कुरा स्वीकार गरे तर उनीहरु धेरै पछि साथी भए ।
किरणसँगको सम्बन्ध विच्छेद नयाँ सम्बन्धमा भएको कारणले भएको हो भनी सोध्दा अभिनेताले न्युज १८ लाई भने,‘न त त्यतिबेला थियो, न अहिले छ ।’
वास्तवमा, गत वर्ष, आमिर र किरण रावले एक संयुक्त विज्ञप्ती जारी गरेर आफ्नो सम्बन्धविच्छेदको घोषणा गर्दै भनेका थिए,‘यी १५ सुन्दर वर्षहरु सँगै हामीले जीवनभरका अनुभव, आनन्द र हाँसो बाँडेका छौँ र हाम्रो सम्बन्ध विश्वास, सम्मान र मायामा मात्र बढेको छ । अब हामी हाम्रो जीवनमा नयाँ अध्याय सुरु गर्न चाहन्छौं – अब पति र पत्नीको रूपमा होइन, तर सह–अभिभावक र एकअर्काको परिवारको रूपमा। हामीले केही समय अघि योजनाबद्ध बिछोड सुरु गर्यौं, र अब छुट्टिएर बस्दा पनि विस्तारित परिवारको रूपमा आफ्नो जीवन बाँड्दै, व्यवस्थालाई औपचारिक बनाउन सहज महसुस गर्छौं।’
