काठमाडौं, २३ चैत । च्याम्पियन्स लिग फुटबल अन्तर्गत क्वाटरफाइनलको पहिलो लेगमा लिभरपुलले बेन्फिकामाथि जित निकालेको छ ।
मंगलबार राति भएको खेलमा लिभरपुलले पोर्चुगिज क्लब बेन्फिकालाई ३–१ गोल अन्तरले पराजित गरेको हो ।
बेन्फिकाको घरेलु मैदानमा भएको खेलमा इब्राहिमा कोनाटेले १७औं मिनेटमा गोल गर्दै लिभरपुललाई सुरुआती अग्रता दिलाएका थिए ।
खेलको ३४औं मिनेटमा साडियो मानेले गोल गर्दै टोलीको अग्रता दोब्बर बनाए ।
तर, खेलको ४९औं मिनेटमा बेन्फिकाका डार्विन नुनेजले गोल गर्दै खेललाई २–१ को स्थितिमा ल्याए ।
खेलको ८७औं मिनेटमा लुइस डियाजले गोल गर्दै लिभरपुललाई ३–१ को जित दिलाए ।
यस जितसँगै लिभरपुलले सेमिफाइनल पुग्ने सम्भावना बलियो बनाएको छ ।
