काठमाडौं, २२ चैत्र । आज संक्रमित भेटिएका तीनजनामध्ये दुईजना एक हप्ता देखि क्वारेन्टाइनमा बस्दै आएको खुलेको छ । क्वारेन्टाइनमा बस्दै आएका दुईजनामा कोरोना भाइरसका लक्षण भेटिएपछि नमूना संकलन गरिएकोमा आज नतिजा आएको थियो ।
नमूना पोजेटिभ आएपछि दुवैजनालाई सेती अस्पतालमा लगिएको छ । स्वास्थ्य मन्त्रालयका प्रवक्ता डा. विकास देवकोटाले कोरोना संक्रमित दुवै पुरुष क्वारेन्टाइनमा बस्दै आएको खुलाएका छन् ।
संक्रमित दुईजना भारतबाट हालै फर्किएका हुन् भने एकजना नेपालभित्र नै रहँदै आएकी हुन् । संक्रमित अर्का भारतको मुम्बईबाट फर्किएका कैलालीका २१ वर्षीय पुरुष हुन् । उनी रोजगारीका लागि मुम्बईमा थिए । लकडाउनका बखत नेपाल फर्किएको बुझिएको छ ।
यसैगरी, अर्का नेपाली उत्तराखण्डबाट फर्किएका कञ्चनपुरका ४१ वर्षीय पुरुष हुन् । उनी पनि कामको सिलसिलामा उत्तराखण्ड पुगेको र लकडाउन भएपछि फर्किएका हुन् । दुवैलाई क्वारेन्टाइनमा राखिएको थियो ।
संक्रमित ३४ वर्षीया महिला यसअघि दुबईबाट फर्किएका धनगढीका ३४ वर्षीय पुरुषका आफन्त हुन् । दुबईबाट फर्किएका ती पुरुषबाट ती महिलामा संक्रमण सरेको बुझिएको छ । उनलाई पनि सेती प्रादेशिक अस्पतालमा राखिएको बुझिएको छ ।
