लमजुङ, ७ साउन : गण्डकी प्रदेशमा नेपाल कम्युनिष्ट पार्टी (नेकपा) का मुख्य सचेतक मायानाथ अधिकारीले पार्टी एकताको मर्मअनुसार दुई अध्यक्ष मिल्नुको विकल्प नरहेको बताए ।
४२ औँ पुष्पलाल स्मृति दिवसका अवसरमा नेकपा लमजुङद्वारा आज बेँसीशहरमा आयोजित कार्यक्रममा बोल्दै उनले कम्तीमा आगामी महाधिवेशनसम्म प्रधानमन्त्री एवं अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’ मिलेर अघि बढनुपर्ने र महाधिवेशनले एकल अध्यक्ष चयन गर्ने बताए ।
नेकपाका केन्द्रीय सदस्यसमेत रहनुभएका मुख्य सचेतक अधिकारीले देशले बलियो र स्थायी सरकार खोजेको अवस्थामा अनावश्यक विवाद गरेर अल्झन नहुने बताउँदै राजनीति सही बाटोमा जाँदा धेरै परिवर्तन भएकाले समृद्ध नेपाल र सुखी नेपालीका लागि नेताहरु मिलेर अघि बढनुपर्ने र जनआकाङ्क्षा पूरा गर्नुपर्नेमा जोड दिए ।
पार्टी एकतालाई जोगाउने हो भने पक्ष–विपक्षमा भन्दा सरकार र पार्टीलाई बलियो बनाउने अभियानमा लाग्नुपर्ने उनको भनाइ थियो ।
कार्यक्रममा गण्डकी प्रदेशका सदस्य महेन्द्रलाल श्रेष्ठ, फूलबहादुर थापा, प्रेम घले, कार्यालय सदस्य कृष्णप्रसाद अधिकारीले सिङ्गो कम्युनिष्ट पार्टीको एकताले पुष्पलालप्रति साँच्चै सम्मान भएको भन्दै अब ‘समृद्ध नेपाल र सुखी नेपाली’ अभियानलाई सार्थक बनाउनुपर्ने बताए । रासस/Photo Source : Facebook page of Mayanath Adhkari
