काठमाडौं, २३ मंसिर । वन तथा वातावरणमन्त्री डा. वीरेन्द्र प्रसाद महतोले जलवायु परिवर्तनसम्बन्धी संयुक्त राष्ट्रसङ्घीय सम्मेलन कोप–२८ नेपालको लागि उपलब्धिमूलक भएको स्पष्ट पारेका छन् । सम्मेलनमा नेपालको बारेमा चर्चा भएको पनि मन्त्री महतोको भनाई छ ।
कोप-२८ मा सहभागी भएर मन्त्री महतो आज (शनिबार) स्वदेश फर्किएलगत्तै त्रिभुवन अन्तर्राष्ट्रिय विमानस्थलमा पत्रकारहरुसँगको संक्षिप्त कुराकानीमा यस्तो बताएका हुन् । मन्त्री महतोले सम्मेलनमा नेपालको सरकारी तथा गैरसरकारी प्रतिनिधिहरुको एकै स्वर रहेको र यसपटक नेपालले आफ्ना एजेन्डा जोडदार रुपमा उठाएको बताए । उनले भने,“ यसपटक हामी वानडोर विन्डोज सिस्टमबाट प्रस्तुत भएका थियौं ।”
मन्त्री महतोले कोप–२८ को पूर्वसन्ध्यामा संयुक्त राष्ट्रसङ्घका महासचिव एन्टोनियो गुटेरेसलेले नेपाल भ्रमण गरेको र नेपाललाई उच्च प्राथमिकतामा राखेकोले यसपटक सम्मेलनमा नेपाललाई उच्च प्राथमिकता दिईएको पनि बताए ।
मन्त्री महतोले यसपटकको सम्मेलनमा नेपालको आफ्नै पेभेलियन भएकोले क्लाईमेट चेञ्जका बारेमा प्रभावकारी रुपमा छलफल तथा अन्तरक्रिया गरिएको जनाए । उनकाअनुसार उक्त पेभेलियनमा नेपालका प्रतिनिधिहरु विहानदेखि बेलुकासम्म व्यस्त भएका थिए ।
मन्त्री महतोले डिसेम्बर ३ मा एडिबीद्धारा आयोजित लञ्च अफ बिल्डिङ एडाप्टेशन एण्ड रिसाईलेन्स टु एचकेजी ईनिसिएटिभ विषयमा सम्बोधन गरेका थिए । यस्तै, डिसेम्बर ३ मा नै लञ्चिङ मेलम्ची डिसास्टर ड्यामेज एसेसमेन्ट रिपोर्ट कार्यक्रममा पनि मन्त्री महतोले सम्बोधन गरेका थिए ।
डिसेम्बर ५ मा भने मन्त्री महतोले नेपाल्स मिटिगेशन इफोट्र्स : रोड टु नेट जिरो कार्यक्रममा र स्केलिङ अप इन्भेष्टमेन्ट इन एड्याप्टेशन द्याट लिभ्स नो वन बिहाईण्ड नामक कार्यक्रममा पनि सम्बोधन गरेका थिए ।
डिसेम्बर ६ मा भने मन्त्री महतोले बिल्डिङ ब्लक्स अफ क्लाइमेट एम्बिसन : पिपुल, नेचर, एण्ड एक्सन कार्यक्रम र लोकल्ली लेड एड्याप्टेशन प्राक्टिस इन नेपाल कार्यक्रममा सम्बोधन गरेका थिए ।
मन्त्री महतोकाअनुसार कोप २८ नेपाल पेभेलियनमा डिसेम्बर ३ देखि डिसेम्बर ८ सम्म २५ वटा साईड इभेन्ट्स सञ्चालन भएका थिए । आगामी दिनमा यही पेभेलियनमा १४ वटा भन्दा बढि साईड इभेन्ट्स हुने पनि उनले जनाए ।
तस्विर : मुकुन्द कालिकोटे/रिपोर्टर्स नेपाल डटकम
