काठमाडौं, ९ माघ । जनता समाजवादी पार्टी, नेपाल सरकारलाई समर्थन गरेर पनि सामेल भएको छैन् । अध्यक्ष उपेन्द्र यादवले मन्त्रालय बाँडफाँडमा आफूहरुलाई अपमान गरिएको भन्दै प्रधानमन्त्री पुष्पकमल दाहालसँग आक्रोशित छन् । उनले आफूसँग मन्त्रालयको भागबण्डाबारे कुनै सिरियस छलफल नभएको जिकिर गर्ने गरेका छन् । पार्टीका नेताहरुसँगको ब्रिफिङमा पनि यादवले प्रधानमन्त्री दाहाल र एमाले अध्यक्ष केपी शर्मा ओलीले पहिल्यै गरेको निर्णय सुनाउनेबाहेक अरु काम नगरेकोले आफूहरु सरकारमा सहभागी हुन नसकेको बताउने गरेका छन् । जसपाका आधा दर्जन सांसद सरकारमा जान आँतुर छन् ।
उनीहरु अध्यक्ष यादवले नै आफूहरुलाई सरकारमा सहभागी हुने वातावरण नबनाएको भनेर आक्रोशित छन् । जसपालाई सरकारमा सहभागी नगराउन एमाले अध्यक्ष ओलीले प्रधानमन्त्री दाहाललाई दबाब दिएको र ओलीकै निर्देशनमा प्रचण्डले जसपालाई भाउ नदिएको खुलासा भएको छ । यादवले गत शनिबारमात्रै एमाले अध्यक्ष ओलीसँग लामो छलफल गरेका थिए ।
सो छलफलमा ओलीले जसपाले माधव नेपाल नेतृत्वको नेकपा (एकीकृत समाजवादी) सँग एकता प्रक्रिया थालेकोबारे ओलीले असन्तुष्टि पोखेका थिए । मंसिर ४ गतेको निर्वाचनमा जसपाले एमालेसँग तालमेल गरेको थियो । दुई दलले असहज परिस्थितिका बावजुदपनि राम्रो नतिजा निकालेका थिए । तर, यादव चुनावमा पराजित भएर काठमाडौं फर्कन नपाउँदै उनले एमालेसँगको सहकार्य तोडिएको घोषणा गरेका थिए ।
उनी कांग्रेस नेतृत्वको तत्कािलन गठबन्धनसँग नजिकिएका थिए । तर, अर्का अध्यक्ष अशोक राईले एमालेसँगको सहकार्य जारी नै रहेको भनेर अर्को सार्वजनिक अभिव्यक्ति दिएर यादवलाई साईजमा राखेका थिए । अहिलेपनि यादव र राईबीच शक्ति–संघर्ष चुलिएको छ । यादवले षड्यन्त्र गरेर राईलाई संसदीय दलको नेता हुनबाट बञ्चित गराएको भनेर जसपाभित्र चर्चा चलेको छ ।
जसपालाई सरकारमा ल्याउनको लागि प्रधानमन्त्री दाहालले अधिकतम प्रयास गरेका थिए । तर, यादवले माधव नेपालसँग एकताको लागि हात बढाएको कारण ओलीले जसपालाई सत्तारोहणमा अवरोध गरेको स्रोतको दाबी छ ।
Related News
जसपा र नेकपा (एस) को एकता–वार्ता सकारात्मक, छिट्टै निश्कर्षमा पुग्ने
‘जसपा ओली र प्रचण्डको भातृसंगठन हो र दुइटा मन्त्री लिएर सरक्क सरकारमा जाने ?’
